Shkencëtarët sigurojnë pamjet e para të kallamarit të rrallë të Antarktidës, 2,152 metra thellë në Oqeanin Jugor

Shkencëtarët kanë kapur pamjet e para të një kallamari të ‘pakapshëm’ antarktik që jeton nën Oqeanin Jugor.

Kallamar i rrallë gonate antarktik u pa më shumë se 2,152 metra thellë në ujërat e ngrira të Antarktidës, transmeton Telegrafi.

Kjo është hera e parë që kjo specie e kuqe, me tentakula grep, është parë ndonjëherë e gjallë në habitatin e saj natyror.

Krijesa tre metra e gjatë (një metër) u pa nga studiuesit në bordin e anijes kërkimore të Institutit të Oqeanit Schmidt, R/V Falkor.

Shkencëtarët kishin ndërmend të kërkonin jetë brenda një thellësie prej  3,000 metra pranë majës veriore të Antarktidës të quajtur Pellgu Powell.

Megjithatë, kur akulli i trashë detar pengoi kalimin e tyre, ekipi u detyrua të vendoste mjetin e tyre të telekomanduar (ROV), SuBastian, i cili bëri zbulimin mahnitës.

Pamjet e kallamarit iu dërguan Kat Bolstad, një eksperte kallamarësh nga Universiteti i Teknologjisë i Auckland, e cila e identifikoi atë si një kallamar gonate antarktik.

Dr. Bolstad i tha National Geographic: "Ky është, sipas njohurive të mia, filmimi i parë i drejtpërdrejtë i kësaj kafshe në të gjithë botën".

Edhe pse shkencëtarët kanë ditur për ekzistencën e kallamarëve gonatë të Antarktidës për më shumë se 100 vjet, të gjitha provat për jetën e tyre vijnë nga ekzemplarët e ngordhur.

Kallamarët janë gjetur në rrjetat e peshkatarëve ose janë ruajtur në stomakun e kafshëve të tjera, por kurrë të gjallë.

Shkencëtarët besojnë se këto krijesa e kalojnë pjesën më të madhe të jetës së tyre duke jetuar në zonën e mesnatës ose batipelagjike, midis 1,000 deri në 4,000 metra.

Në këto thellësi ekstreme, e vetmja dritë është ajo e prodhuar nga kafshët e çuditshme që jetojnë atje. /Telegrafi/