Shefi ekzekutiv i Ligës Premier tregon se kur do të fillojë afati kalimtar

Afati kalimtar në Ligën Premier nuk do të hapet pa përfunduar sezoni. Kështu ka bërë të ditur shefi ekzekutiv i kampionatit anglez, Richard Masters.

Periudha verore për transferimin e lojtarëve zakonisht fillon më 1 korrik, mirëpo meqenëse sezoni në Angli do të rifillojë më 17 qershor, atëherë është e qartë se sezoni 2019/2020 nuk do të mbarojë në fillim të korrikut.

Kampionati anglez pritet të përfundojë në javën e 25 dhe 26 korrikut, ndërsa Masters e ka bërë të qartë se deri atëherë klubet nuk do të mund të blejnë futbollistë. Në një intervistë për Football Daily, shefi i Ligës Premier është pyetur për afatin kalimtar veror.

“Është një nga temat që po i diskutojmë. Kemi folur që nga dita e parë, mirëpo nuk kemi marrë vendime. Kemi përfundime të lëvizshme në ligat e ndryshme evropiane, të cilat fillojnë dhe mbarojnë në kohë të ndryshme”, ka deklaruar ai.

Në vazhdim, Masters është pyetur nëse do të ketë një gërshetim të afatit kalimtar me rrjedhën e kampionatit, duke mohuar diçka të tillë.

“Afati kalimtar do të hapet pas përfundimit të sezonit, është vetëm çështje se sa do të zgjatë (kampionati)”, ka deklaruar shefi i Ligës Premier. /Telegrafi/