Profesori i propozon martesë studentes në Indi, sulmohet fizikisht nga studentët tjerë
Tension mbizotëroi në Kolegjin Mjekësor Sri Siddhartha (SSMC) në Tumkur të Karnatakas, Indi, pasi një profesor i propozoi martesë një studenteje para klasës.
Në përgjigje, studentët e sulmuan fizikisht profesorin.
Kolegji, në pronësi të Ministrit të Brendshëm të Karnatakas, G Parameshwara, e ka pezulluar profesorin dhe kundër tij është regjistruar një padi penale.
Në një video të filmuar nga njëri prej studentëve, profesori, i identifikuar si Abdul, dëgjohet duke thënë: "Nuk munda t'i rezistoja dashurisë së madhe dhe do të doja t'i propozoja njërës prej vajzave në grupin tuaj... dhe do t'u shpërndaj çokollata të gjithëve".
Ai përfundoi duke i thënë studentes "Të dua".
Ndërsa profesori zbriti nga podiumi, studentja u përball me të dhe i kërkoi të fliste me drejtorin.
Gjatë përballjes, profesori pretendoi se studentja i kishte shprehur dashurinë dhe se ai kishte prova për të njëjtën gjë.
"A nuk më the të dua?”, e pyeti profesori studenten.
"Ka pamje filmike nga kamerat e sigurisë”, shtoi ai.
Ndërsa lajmi për incidentin u përhap, studentë të tjerë u zemëruan dhe u përballën me profesorin, duke çuar në një grindje të ashpër. /Telegrafi/