Hamshori hollivudian, Brad Pitt, thuhet se është në lidhje me bukuroshen e ekranit, Charlize Theron, e cila është 12 vjet më e re se ai.
Me njëri-tjetrin i ka njoftuar ish-i fejuari i aktores, Sean Penn, ndërsa romanca e tyre ka nisur gjatë festave të fundvitit.
"Ata po takohen joformalisht qe një muaj. Një periudhë kanë qenë miq shumë të afërt, ndërsa më pas gjërat mes tyre u zhvilluan në diçka më shumë, është ironike se i ka njoftuar pikërisht Penn", ka thënë një burim i afërt me çiftin për The Sun.
Në fundjavën e kaluar, Pitt dhe Theron janë parë bashkë në një ndejë, pasi kishin qenë në projekte të ndara filmike.
"Brad pinte ujë mineral, derisa Charlize një koktej me vodka. Ishin shumë intimë, përkëdheleshin dhe qeshnin gjatë gjithë mbrëmjes", ka shtuar burimi.
Theksojmë se kjo mund të konsiderohet si lidhja e parë serioze e 55-vjeçarit që nga shkurorëzimi me Angelina Jolie në vitin 2016.
Ndërsa para tij, Theron ka qenë në lidhje me disa aktorë të njohur, në mesin e tyre Keanu Reeves, Ryan Reynolds, Alexander Skarsgard dhe Sean Penn, me të cilin ka qenë e fejuar. /Telegrafi/