Ndërsa promovonte filmin e tij të ri "The Cut", Orlando Bloom foli për herë të parë për ndarjen e tij të fundit nga këngëtarja Katy Perry dhe theksoi se ata janë në marrëdhënie të mira.
Bloom u shfaq në emisionin "Today" ku prezantuesi Craig Melvin e pyeti për ndarjen.
"Ka pasur disa ndryshime personale në jetën tënde që nga hera e fundit që ishe këtu," vërejti Melvin përpara se të pyeste: "Si je?".
Bloom u përgjigj: "Jam shumë mirë, vëlla. Jam shumë mirënjohës. Kemi vajzën më të bukur. E dini kur 'e lë zemrën në fushë' siç bëra unë në këtë film? Ndihem mirënjohës për të gjitha këto."
Ylli i "Piratëve të Karaibeve", i cili ka një vajzë pesëvjeçare, Daisy, me këngëtaren Katy, theksoi se ata janë në marrëdhënie të mira: "Jemi shkëlqyeshëm. Do të jemi të shkëlqyer. Asgjë tjetër përveç dashurisë".
Në qershor, u përhap lajmi se Bloom dhe Perry i kishin dhënë fund lidhjes së tyre pas gati një dekade së bashku.
Çifti konfirmoi në fillim të korrikut se kishin vendosur të ndryshonin natyrën e marrëdhënies së tyre dhe se në të ardhmen do të përqendroheshin ekskluzivisht në bashkëprindërimin.
"Për shkak të interesit të madh dhe bisedave të shumta rreth marrëdhënies së Orlando Bloom dhe Katy Perry, ne konfirmojmë se Orlando dhe Katy kanë ndryshuar natyrën e marrëdhënies së tyre në muajt e fundit dhe janë përqendruar vetëm te prindërimi. Ata do të vazhdojnë të konsiderohen një familje sepse përparësia e tyre e përbashkët është dhe gjithmonë do të jetë - rritja e vajzës së tyre me dashuri, stabilitet dhe respekt të ndërsjellë", thanë përfaqësuesit e tyre.
Megjithatë, pas ndarjes, ata u panë së bashku me vajzën e tyre duke pushuar me Jeff Bezos dhe Lauren Sanchez në një jaht. /Telegrafi/