Sipas mediave angleze, Barcelona është e gatshme të aktivizojë klauzolën e blerjes së Marcus Rashford në fund të sezonit.
Sulmuesi anglez, i cili u bashkua me klubin katalanas në formë huazimi nga Manchester United, ka bërë përshtypje të fortë nën drejtimin e trajnerit Hansi Flick.
Që prej mbërritjes në “Camp Nou”, Rashford ka shënuar tre gola dhe ka dhënë pesë asiste në vetëm shtatë ndeshje, duke u bërë një nga figurat më të rëndësishme të Barcelonës gjatë një periudhe të vështirë me lëndime në skuadër.
Drejtori sportiv Deco ka deklaruar se klubi do të presë përpara se të marrë një vendim përfundimtar, megjithatë forma e shkëlqyer e Rashford e ka bërë më të lehtë mundësinë që Barça të aktivizojë opsionin e blerjes prej 30 milionë eurove.
Sipas raportimeve, Manchester United është i hapur për marrëveshjen dhe e sheh tarifën si të arsyeshme për të dyja palët.
Ndërkohë, Rashford thuhet se është i lumtur në Barcelonë dhe dëshiron të vazhdojë aventurën e tij në La Liga, duke synuar të provojë se meriton një qëndrim afatgjatë te Blaugranat. /Telegrafi/