Christina Aguilera e ka publikuar këngën me titull "Twice" që është pjesë e albumit të ardhshëm, "Liberation".
Në fillim të këtij muaji, këngëtarja ka nisur incizimin e materialit të ri muzikor, për herë të parë pas pushimit gjashtëvjeçar.
Kënga e parë të cilën e lansoi ishte "Accelerate" dhe e shoqëroi me videoklip, ndërsa projekti ishte produksion i Kanye West.
Ashtu si edhe albumi, "Liberation", titullohet edhe një këngë, e cila është baladë dhe pritet të shoqërohet me videoklip.
"Nganjëherë pyes veten se cili është qëllimi i jetës. E kam gjetur çmimin e dashurisë dhe kam humbur mendjen", janë disa prej vargjeve të këngës së re.
Krahas këngës së re, Aguilera ka bërë të ditur se në ceremoninë e ndarjes së çmimeve Billboard Music Awards do ta prezantojë këngën e tretë nga albumi i ri, e cila titullohet "Fall in Line", ndërsa do ta interpretojë së bashku me Demi Lovaton.
Në ndërkohë, 37-vjeçarja është duke u përgatitur për turneun muzikor që do ta mbajë këtë vit në Amerikë.
Kujtojmë që albumin e fundit, me titull "Lotus", Christina e kishte publikuar në vitin 2012. /Telegrafi/