Alba: Nëse Reali nuk e bën ‘Korridorin e Nderit’, do të jetë një vendim nga lart dhe jo nga lojtarët

Triumfi në Estadio Riazor kundër Deportivo La Corunas bëri që Barcelona të shpallej kampion i La Ligas për sezonin 2017/2018, ndërsa një javë më parë Blaugranët e fituan edhe Kupën e Mbretit.

Tashmë ka nisur të flitet për ndeshjen e javës së ardhme, ‘el Clasicon’, me ç’rast Real Madridi udhëton në Camp Nou, ku ndeshja do të zhvillohet në një atmosferë festive të tifozëve katalunas.

Çështja kryesore është se a do ta bënë Los Blancos atë që njihet si ‘Korridor i Nderit’ për rivalin e tyre më të madh. Jordi Alba ka thënë se nëse kjo nuk do të ndodhë, do të jetë një vendim i kryesisë së Realit dhe jo i lojtarëve.

Lexo po ashtu Të gjitha lajmet për EL CLASICO

“Nuk është një vendim që e marrim ne, secili ka respekt për ata që e marrin. Kupa e Botës për Klube ishte një garë ku ne nuk morëm pjesë, në (Santiago) Bernabeu në ligë, ne e kemi bërë ‘Korridorin e Nderit më herët'”.

“Nëse ata nuk duan të na e bëjnë ‘Korridorin e Nderit’, do të jetë për shkak të një vendimi të kryesisë”, ka thënë mbrojtësi i krahut.

Alba më tej ka folur në lidhje me gëzimin për suksesin e arritur të Barcelonës këtë edicion duke arritur t’i fitojë dy trofe.

“Trofeu i dyfishtë është arritur vetëm tetë herë në historinë e Barcelonës dhe ne duhet të jemi shumë të kënaqur”, ka thënë ai. /Telegrafi/