Alarmi i kryeprokurorëve italianë: Mafia shqiptare po bën “ligjin” në Itali

Kryeprokurorët italianë kanë ngritur alarmin për zgjerimin e mafias shqiptare.

Gjatë raportimit në komisionin parlamentar antimafia, kryeprokurori i Romës, Francesco Lo Voi dhe Ilaria Calò, theksuan se shqiptarët nuk janë më çirakë të mafias lokale, por janë kthyer në ndërmjetësues të ndërkombëtarë droge.

“Calò shpjegoi se si mafia shqiptare ka bërë kapërcimin përfundimtar në cilësi në qytetin e përjetshëm, duke u kthyer nga një çirak i mafies vendase në ndërmjetësues ndërkombëtar droge”, raporton la Repubblica.

Ndërsa kryeprokurori Francesco Lo Voi theksoi se në hetime janë gjetur lidhje mes kriminelëve të pastër dhe kriminelëve “politikë”. Sipas tij marrëdhënia midis krimit romak dhe disa qarqeve politike po bëhet gjithnjë e më e ngushtë. Ai foli edhe për mjetet e pakta që prokuroria e Romës ka në dispozicion për të luftuar këtë fenomen.

“Realiteti romak është një realitet kompleks që luftohet çdo ditë me ato pak armë që ka në dispozicion prokuroria e kryeqytetit, e cila është vazhdimisht edhe pa staf.

Dy magjistratët u ndalën në pikat vendimtare të luftës kundër krimit të madh.

“Prania e krimit të tipit mafioz vazhdon të ndihet në qytetin e Romës, në qendrat e zonës metropolitane dhe në provincat e tjera të Lazios me karakteristikat e mafias tradicionale, të cilat e kanë të lehtë të riinvestojnë paratë e paligjshme në aktivitetet e pastrimit të parave. Format më të ndryshme janë jo vetëm ndërtimi, por edhe hotelerie, shërbime dhe logjistike”.

Për Lo Voi është e nevojshme që ligjvënësit të vazhdojë të ofrojnë mjete për të luftuar fenomene të tilla mafioze që prekin ekonominë, demokracinë, lirinë e sipërmarrjes, menaxhimin e tregut dhe vetë marrëdhëniet shoqërore.

“Në mungesë të këtyre mjeteve do ta kemi të vështirë të arrijmë rezultate të caktuara”, theksoi ai./A2 CNN