Abdixhiku: Ekspozita për Sali Çekajn i pasqyron dy anët e tij, të një intelektuali të rrallë e luftëtari trim

Kryetari i Lidhjes Demokratike të Kosovës, Lumir Abdixhku ka marrë pjesë në ekspozitën për Sali Çekajn.

Abdixhiku ka thënë se Sali Çekaj ishte luftëtar i madh e intelektuali i shquar i lëvizjes për liri e pavarësi, transmeton Telegrafi.

“Një jurist, një politikan, një oficer, një prijës i dalluar i UÇK-së. Bashkëluftëtarët me të drejtë e quanin ‘Veteran’ – sepse ishte ndër të parët e të rrallët. Sali Çekaj, ishte edhe aktivist i LDK-së; nënkryetar i Degës në Gjermani, shtytës i organizimeve thelbësore në mërgatë”, thotë ai.

Më tej, kreu i LDK-së pohon se “Ekspozita në Muzeun e Kosovës i pasqyron dy anët e tij – të një intelektuali të rrallë e luftëtari trim; nga ditët e para të aktivimit politik e deri tek e përjetshmja, e rënies së tij”.

“Më la përshtypje fotografia e fundit me familje, para nisjes për në Kosovë. Kishte aq gëzim tek të gjithë; tek ai, tek fëmijët e tij. Nga ajo ditë ndarëse, Sali Çekaj fitoi një familje më të madhe”, ka shkruar Abdixhiku në Facebook. /Telegrafi/