A duhet të kthehet Totti në Përfaqësuese?

Legjenda e Romës dhe Italisë, Francesco Totti, nuk ka luajtur për përfaqësuesen Azzure që nga finalja e Kupës së Botës në vitin 2006, ndërsa së fundmi ka deklaruar se po t’ia bënte ftesën trajneri Marcello Lippi, ai nuk do të thoshte jo pa u menduar mirë.

Simboli romak ka debutuar për Italinë në vitin 1998, është paraqitur 58 herë dhe ka shënuar nëntë gola. Ndërsa goli i tij i fundit kundër Australisë nga penalltia, ia siguroi kualifikimin Italisë për çerekfinalen e Kupës së Botës në vitin 2006, të cilën italianët e fituan.

Para Kampionatit Botëror të vitit 2006, Er Pupone pësoi një lëndim shumë serioz i cili ia kërcënoi karrierën, mirëpo ai arriti të rikuperohej që të ishte pjesë e skuadrës së Lippit me të cilën shkroi historinë duke u shpallur kampion.

Pas Kampionatit Botëror 2006, Numri Dhjetë i Romës u tërhoq nga Kombëtarja e tij dhe iu përkushtua Romës dhe vazhdimisht ka refuzuar rikthimin në përfaqësuese. Mirëpo, rikthimi i Marcello Lippit duket se ia ka ndërruar mendjen.

“Nëse më fton nuk do të them jo menjëherë. Do të mendohesha mirë para se të sjell një vendim, sepse është në pyetje Lippi, i cili gjithmonë ka mbajtur një qëndrim të veçantë për mua”, ka thënë Totti për “Corriere dello Sport”.

Besoni që Lippi duhet ta ftojë Tottin në Përfaqësuesen italiane dhe a do të ishte njeriu i duhur për italianët? Ose ndoshta tashmë i ka kaluar koha legjendës romake?