Zyrtare: Salihi bëhet me skuadër të re

Hamdi Salihi është kthyer përsëri në kampionatin ku ka kaluar disa nga vitet më të suksesshme të karrierës së tij, atë austriak.

Por këtë radhë, sulmuesi shqiptar do të luajë në kategorinë e dytë në këtë vend, pasi ka nënshkruar me klubin e Wiener Neus tad.

Drejtori sportiv i klubit austriak, Andreas Shiker, ka treguar për mediat në këtë vend se marrëveshja mes palëve është thuajse e mbyllur, por ka një detaj që duhet saktësuar, atë të dënimit që mori sulmuesi në ndeshjen me Kukësin.

“Ai mund të shënojë përsëri me rregullsi. I ka pëlqyer shumë koha që kaloi këtu në Vjenë dhe dëshironte që të kthehej bashkë me familjen e tij. Unë mësova për një gjë të tillë nga miqtë e mi dhe po e kërkoja prej disa javësh”, tregoi Shiker,.

Klubi austriak duket i bindur se mund të anashkalojë dënimin me 10 ndeshje pezullim që i janë dhënë sulmuesit nga Komisioni i Disiplinës. “Ai dënim do të vlejë vetëm për Shqipërinë. Këtë çështje do ta çojmë për shqyrtim para Federatës Austriake”, tha drejtuesi i klubit të ri të sulmuesit shqiptar.

Salihi ka qenë një nga yjet e kampionatit austriak në të kaluarën, duke veshur fanellën e Ried (2007-2009) dhe Rapid Vjenë (2009-2012). Ai ka shënuar 53 gola me fanellën e Ried dhe 38 gola me atë të Rapid Vjenës gjatë viteve të tij në Austri.