Zyra e Kryeministrit i reagon Ramosajt: Vendimi i Qeverisë për ndërprerjen e punimeve ende qëndron

Edhe pse ditë më parë Qeveria e Republikës së Kosovës kishte ndërprerë punimet në rrugën R108, përkatësisht në rrugën Deçan-Plavë, pasi thanë se një pjesë e saj e prek zonën e veçantë të mbrojtur të Manastirit të Deçanit, kryetari i Komunës së Deçanit, Bashkim Ramosaj, në një intervistë në RTV Dukagjini ka thënë se punimet kanë filluar një ditë më parë, në këtë rrugë.

Në lidhje me këtë këshilltari për media i zyrës së Kryeministrit të Republikës së Kosovës, Xhavit Beqiri, në një prononcim për Telegrafin theksoi se vendimi i kryeministrit Avdullah Hoti, për ndërprerjen e punimeve qëndron, dhe se sipas tij, nuk duhet t’i hiqet asnjë presje vendimit.

Lexo po ashtu Rifillojnë punimet në rrugën Deçan-Plavë, flet kryetari Ramosaj

“Kryetari i Komunës së Deçanit, duhet ta di vendimin e kryeministrit Hoti. Këtij vendimi nuk i hiqet asnjë presje. Ne qëndrojmë prapa njoftimit që kemi lëshuar”, ka thënë Beqiri.

Ndryshe, kryeministri i Qeverisë së Republikës së Kosovës, Avdullah Hoti kishte kërkuar që të pezullohen punimet në rrugën R108, e cila, siç thuhej në njoftim e Qeverisë një pjesë të saj, e prek zonën e veçantë të mbrojtur të Manastirit të Deçanit. /Telegrafi/