Zjarrfikësit në Ferizaj kërkojnë kushte më të mira për punë

Zjarrfikësit në Ferizaj prej vitesh po vazhdojnë të përballen me mungesë të stafit, makinerisë, pajisjeve të tjera për punë dhe me të ardhura të dobëta financiare. Pavarësisht kësaj, ky institucion po vazhdon t’i dalë në ndihmë qytetarëve sa herë që ata kanë nevojë për fikje të zjarreve të ndryshme në shtëpie, banesa, fusha e male. Pastaj hapje të dyerve të ashensorëve, aksidente të komunikacionit, në energji elektrike e të tjera. Gjatë kësaj periudhe të këtij viti sipas raporteve të këtij institucioni, zjarrfikësit kanë intervenuar në 820 raste të ndryshme

Zymri Krasniqi, komandant i zjarrfikësve në Ferizaj, në një intervistë për Telegrafin, ka thënë se intervenimet e tyre ndahen nëpër kategori të ndryshme, ndërkaq e gjithë ndërrimi i kujdestarisë mbulohet me 3 deri në 4 zjarrfikës, që sipas tij është një numër i vogël i zjarrfikësve.

“Gjithsejtë jemi 27 zjarrfikës në shërbimin tonë në kuadër të ministrisë së Punëve të brendshme apo nga AME-ja. Ndërkaq kemi 3 deri në 4 zjarrfikës në një ndërrim që i bije një numër shumë i vogël. Mirëpo e kemi edhe një shoqatë e cila është prej tridhjetë e dy personave që na asistojnë dhe na bashkëngjiten për angazhimin dhe punën tonë që e kemi jashtëzakonisht të madhe në sezonin e verës dhe jemi falënderues ndaj Komunës që gjithmonë kemi qenë me një gjuhë të përbashkët që kemi arrit këtë shoqatë ta aktivizojmë si shoqatë asistuese në zjarre, fushore dhe malore dhe kemi arrit që gjendja në Komunën e Ferizajt të jetë në nivel duhur”, ka thënë Krasniqi.

Sipas Krasniqit, zjarret i kanë pasojat e veta, mirëpo gjithmonë mundohen të intervenojnë me kohë pas kërkesave të qytetarëve.

“Ferizaji me gjithë këtë kapacitetin që ka me tre zjarrfikës në një ndërrim as që paramendohet ta vendosësh punën dhe të rrish në kujdestari, se është e vështirë. Mirëpo kemi arrit dhe kemi gjetur mundësi edhe ne si staf komandues të jemi në gjendje gatishmërie, aty ku ka pasur nevoja e kemi lanë gjithë punët administrative dhe së bashku me zjarrfikësit kemi intervenuar me kohë dhe kemi treguar rezultate pozitive”, ka thënë më tej Krasniqi.

Sa i përket makinerisë, Krasniqi tregon se gjendjen e kanë mjaftë të dobët dhe shumë të vështirë për të intervenuar.

“Autosistema furnizuese kemi pak ose hiç. Kështu që kur kemi një zjarr të madh, realisht e kemi më të vështir, nëse zjarri është me përmasa të mëdha siç e patëm rastin në Manastir ku aty u djegë një objekt me materiale të ndryshme, atëherë kemi shumë telashe dhe vështirësi. Prandaj duhet të kërkojmë ndihmë nga komunat tjera”, ka thënë më tej Krasniqi.

Pavarësisht sfidave, vullneti i zjarrfikësve ka bërë që mos të dështojnë në asnjë intervenim. Krasniqi ka shpjeguar se në çdo mëngjes secili zyrtar qoftë edhe administrativ është i përgatitur për të marrë pjesë në intervenime.

“Sa i përket të ardhurave ne si zjarrfikës kemi ngecur shumë. Më shqetësuese është se nuk marrim pagesa për rrezikshmëri me të cilën përballemi çdo ditë. Pra nga marsi i vitit të kaluar është larguar pagesa për rrezikshmëri për zjarrfikësit”, ka shpjeguar Krasniqi. /Telegrafi/