Zëvendësministri i Arsimit: Prioritet hapja e çerdheve, hapja e shkollave ka kosto të madhe

Zëvendësministri në detyrë i Arsimit, Xhavit Rexhaj thotë se është duke u punuar në disa skenarë sa i përket fillimit të mësimit në shkolla.

Rexhaj në “RTV Dukagjini” thotë se një skenar është të fillohet vetëm me çerdhe ku janë rreth 7 mijë fëmijë që duhet të vendosen aty.

Ai thotë se nëse shkollat dezinfektohen vetëm një herë kostoja më optimale do të ishte 600- 700 mijë euro.

“Është kosto e madhe që Ministria e Arsimit nuk mund ta përballojë. As komunat nuk mund të përballojnë kosto të tilla prandaj edhe këto çështje duhet të merren parasysh”, tha ai, përcjell Telegrafi.

Rexhaj thotë se qeveria duhet ta prioritizojë edhe çështjen e arsimit pasi sipas tij kjo fushë nuk është përfshirë as në pakon emergjente.

“Janë edhe shumë fëmijë që përbëjnë rreth 7% të gjithë nxënësve nuk kanë pasur pajisje apo qasje në internet që të përcjellin mësimin. Duhet të bëjmë diçka edhe për ata që të mos mbesin mbrapa”.

Zëvendësministri në detyrë i Arsimit thotë se mësimi në distancë i ka kaluar pritshmëritë pasi një numër shumë i madh i nxënësve e ka ndjekur mësimin online./Telegrafi/