Zbulim i ri – shkencëtarët aksidentalisht zbulojnë një qenie që nuk thith oksigjen

Oksigjeni përbën rreth 20% të atmosferës së Tokës, proces ky që ndihmon në frymëmarrjen qelizore. Por siç duket jo të gjitha qeniet thithin okisgjen.

Sipas mediave të huaja, përcjell Telegrafi, shkencëtarët në Tel Aviv kanë zbuluar një parazit të quajtur “Henneguya salminicola” që sipas tyre është qenia e parë shumëqelizore e gjetur ndonjëherë që në procesin e frymëmarrjes nuk përdor oksigjenin.

“Henneguya salminicola” është qenie e vogël e përbërë me vetëm 10 qeliza, që duket pak si një leshterikë, e ngjashme me kandilin e detit.

Ekipi i studiuesve e gjeti parazitin në indin e muskujve të një peshku salmon, ndërsa zbulimi se nuk përdor oksigjenin për frymëmarrje ishte krejt i rastësishëm.

Ndërsa ata studionin gjenomin e specieve zbuluan se paraziti nuk përmban mitokondri, organel ky që konverton oksigjenin në energji.

“Frymëmarrja aerobike u mendua të ishte e përhapur te kafshët, por tani e konfirmuam që nuk është kështu”, tha Dorothee Huchon, zoologe në Universitetin e Tel Aviv.

“Zbulimi ynë tregon se evolucioni mund të shkojë në drejtime të çuditshme”, tha Huchon.

“Frymëmarrja aerobike është një burim kryesor i energjisë, ndërsa gjetëm një qenie që nuk e aplikon fare”, ka shtuar ajo.

Huchon ka shtuar se ende nuk dihet se si “Henneguya salminicola” gjeneron energjinë për veten e tij, mirëpo ky zbulim ka rëndësi të madhe në fushën e kërkimit evolucionar.

“Në përgjithësi mendohet se gjatë evolucionit, organizmat bëhen gjithnjë e më komplekse, dhe se organizmat e thjeshtë njëqelizorë ose pak qelizorë janë paraardhësit e organizmave komplekse”, citohet të ketë thënë ajo.

“Ndërsa këtij paraziti, procesi evolucionar i ndodhë e kundërta”, thotë Huchon.

“Duke jetuar në një mjedis pa oksigjen, ai ka derdhur gjenet e panevojshme përgjegjëse për frymëmarrjen aerobike dhe është bërë një organizëm edhe më i thjeshtë”, ka thënë ndër tjerash shkencëtarja. /Telegrafi/