VV demanton AAK-në e Nismën: I ftuam në takim për protestë, por nuk shprehen interesim

Kryesia e Kuvendit të Kosovës, ka caktuar datën e 1 shtatorit për mbajtjen e seancës plenare për ratifikimin e marrëveshjes së Demarkacionit me Malin e Zi.

E pikërisht në këtë ditë, subjekti më i madh opozitar, Lëvizja Vetëvendosje, ka thirrur protestë gjithëpopullore në Prishtinë.

Këtë e bëri të ditur sot në një konferencë për media, lideri i VV-së, Visar Ymeri.

“Më 1 shtator protestojmë në sheshin e Prishtinës. Demarkacionin do ta ndalim me çdo kusht e çdo mjet demokratik”, ka thënë ndër të tjera i pari i VV-së, Visar Ymeri

Telegrafi kishte raportuar edhe mbrëmë për planifikimin e mbajtjes së kësaj proteste më 1 shtator.

Lexo po ashtu Vetëvendosje, me protestë gjithëpopullore më 1 shtator?

E thirrja e kësaj proteste nga VV-ja, nuk ka marrë mbështetjen e dy partive të tjera opozitare, AAK e Nisma për Kosovën.

Në AAK kanë deklaruar se nuk kanë qenë pjesë e konsultave e as organizmit të kësaj proteste.

Por, një gjë të tillë e kanë mohuar në Lëvizjen Vetëvendosje. Zëdhënësi i kësaj lëvizje, Frashër Krasniqi ka thënë për Telegrafin se i kanë ftuar të dy subjektet për takim dhe koordimin për caktimin e mbajtjes së protestës.

“Para se të vendosim për protestën, ne i kemi ftuar të dy subjektet për takim dhe koordinim, por ka pasur mungesë interesimi nga ana e tyre. Ne mendojmë që tash e 12 muaj demarkacioni është pamundësuar në saje të protestave të fuqishme brenda dhe jashtë Kuvendit”, ka thënë Krasniqi.

Lexo po ashtu Vetëvendosje: Më 1 shtator protestojmë në sheshin e Prishtinës

Krasniqi ka shtuar se nuk ka kuptim të heqim dorë nga protestat kur tashmë është konfirmuar që ato janë efektive dhe përmes tyre arrijmë parandalimin e marrëveshjeve të dëmshme.

Vetëvendosje edhe më parë kishte paralajmëruar se rezistenca e tyre do të jetë e pakompromis për të ndalë ratifikimin e kësaj marrëveshjeje, të cilën ata e konsiderojnë të dëmshme për vendin./Telegrafi/