Vrasje, korrupsion dhe drogë: Ish-polici që ndërtoi perandorinë e drogës

Më pak se katër vjet i janë dashur bandës së dobët të drogës, që udhëhiqej nga një ish-polic, që të bëhet sinonim i terrorit. Dikur ata ishin të varurit e kartelit Sinaloa që udhëhiqej nga Joaquin Guzman, i njohur si El Chapo, por tash ia dolën të kenë kartelin që synon dominimin total në Meksikë.

Ata quhen CJNG (Karteli Jalisco i Gjeneratës së Re), ndërsa në krye të saj është ish-polici Nemesio Oseguera, i njohur si El Mencho. Karteli ia doli të rritet në perandori të drogës dhe ata janë gati të marrin të gjitha punët e kartelit Sinaloa.

Kjo situatë tregon se sa lehtë ndërrohen krerët e biznesit të drogës, që në Meksikë vlen me miliarda dollarë.

Për të arritur në maje të piramidës, CJNG ka bërë masakra e vrasje rekorde gjatë kohës së presidentit Enrique Pene Nieto, i cili me ardhjen në post më 2012 u betua se do të ulte normën e dhunës në vend, raporton Reuters, transmeton Telegrafi.

Pena Nieto ia doli në planin e tij, pasi nga 33 shefa mafiozë, nga 37 sa janë gjithsej, kanë përfunduar në grila apo tri metra nën dhe. Por, numri prej 3800 vrasjeve në korrik tregon dobësinë e pushtetit të tij në kohën kur karteli i ri po ngritët në skenën e drogës.

Problem shtesë për presidentin është fakti se Policia lehtë korruptohet, si dhe zyrtarët shtetëror. Madje, besohet se çdo i pesti zyrtar bashkëpunon me mafien.

Anëtarët e kartelit të ri zanatin e kanë marrën nën El Chapon, ndërsa kanë vazhduar me teknikat e frikësimit, korruptim të Policisë dhe eliminim të atyre që u dalin në rrugë. Ekspertët e sigurisë thonë se ata kanë në plan për të marrë rrugët kartelit Sinaloa për kontrabandë droge.

Sipas disa informatave, CJNG është tashmë furnizuesi më i madh i kristalit të metamfetaminës në Shtetet e Bashkuara, që është dëshmi se do të eliminojnë të gjithë kundërshtarët e nëntokës meksikane. /Telegrafi/