Vrasja në Ferizaj, dyshohet se 83-vjeçaren e vrau djali i saj

Një ngjarje e rëndë ka ndodhur sot në Ferizaj, ku një 83-vjeçare është vrarë, ndërsa dorasi dyshohet se është djali i saj.

I dyshuari, B.Ç, 62 vjeçar është ndaluar në kohëzgjatje prej 48 orësh.

“Prokuroria Themelore në Ferizaj, Departamenti për Krime të Rënda, ju njofton se sot, në Ferizaj, një person dyshohet se ka privuar nga jeta nënën e tij. Ngjarja ka ndodhur rreth orës 08:00, në mëngjes, ku i dyshuari B. Ç., rreth 62 vjeç, dyshohet se në shtëpinë e tij në rrugën ‘Ejup Statovci”, në Ferizaj, ka privuar nga jeta nënën e tij, tani të ndjerën M. Ç, rreth moshës 83 vjeçare”, thuhet në njoftim.

I dyshuari B. Ç, me vendim të prokurorit është ndaluar në kohëzgjatje prej 48 orësh dhe brenda afatit ligjor ndaj tij do të kërkohet masa për sigurimin e të pandehurit në procedurë penale.​

Ndryshe, sot në orët e mëngjesit ka ndodhur një ngjarje e rëndë në Ferizaj, ku një grua 83 vjeçare është vrarë.

Agim Gashi, nga Policia e Kosovës për rajonin e Ferizajt i tha Telegrafit se ngjarja ka ndodhur në orët e mëngjesit, ndërsa është arrestuar i dyshuari.

““Rreth orës 08:20, policia ka marrë informatën për një rast vrasje e rëndë në Ferizaj. Në vendin e ngjarjes kanë dalë njësitet policore si dhe ekipi mjekësor, ku pas ekzaminimit nga ana e mjekut është konfirmuar se viktima e rastit kishte ndërruar jetë. Viktima M.Ç. (Shtetase e Kosovës e moshës 83 vjeçare)”, tha ai. /Telegrafi/