Vëllai i Ballistit kërkon ndihmë nga shteti dhe ambasada, tregon edhe për momentin e arrestimit

Ismail Morina është shumë pranë ekstradimit në Beograd, pas vendimit të marrë nga gjykata kroate e shkallës së parë pak ditë më parë.

Në një intervistë për Top Channel vëllai i tij, Xhevahir Morina, i cili ishte me Ismailin kur e arrestuan rreth dy muaj më parë, tregon ngjarjen.

Lexo po ashtu Shqipëria kërkon mosekstradimin e Ballist Morinës

“Na vdiq babai dhe Ismaili vendosi të vinte për ceremoninë e varrimit. Por, ai ishte pa pasaportën shqiptare pasi ia ka mbajtur shteti shqiptar. Në momentin që po kalonim kufirin me shtetin kroat, duke qenë se nuk kishte pasaportën shqiptare që shoqëronte dokumentin italian e arrestuan. Ka rreth dy muaj në burg dhe nga shteti shqiptar dhe ambasada nuk është interesuar askush”, ka thënë Xhevahir Morina.

Sipas vëllait të Ballistit, kanë mbetur edhe pak ditë nga reagimi që duhet të bëjë avokati i tij për të shmangur ekstradimin në Beograd.

“Vëllai më tha të bëj të pamundurën për të mos e dërguar në Beograd. I bëj thirrje kryeministrit dhe ministrit të Drejtësisë që të na ndihmojnë për të mos e çuar vëllanë tonë atje. I bëjmë thirrje kujtdo që mundet të na ndihmojë”, ka apeluar Xhevahiri.