Vazhdojnë protestat në Serbi, studentët nga Beogradi nisen në këmbë për Novi Sad

Sot, një grup studentësh nga Beogradi është nisur në këmbë drejt Novi Sadit për t’u bashkuar me demonstruesit atje, të cilët kanë bllokuar disa ura dhe rrugë kryesore si shenjë proteste.

Sipas gazetës danas, ky marshim simbolik është një akt solidariteti me qytetarët e Novi Sadit, të cilët kërkojnë përgjigje dhe masa konkrete nga autoritetet.

Pavarësisht dorëheqjes së kryeministrit të Serbisë, Millos Vuçeviq, protestat nuk janë ndalur. Demonstruesit kërkojnë jo vetëm drejtësi për tragjedinë, por edhe ndryshime të thella në sistemin politik dhe institucional të vendit.

Lexo po ashtu Fillon greva e përgjithshme në Serbi - Vuçiq nuk po i përmbush katër kërkesat e studentëve

Shumë prej tyre pretendojnë se dorëheqja e Vuçeviqit nuk është e mjaftueshme dhe se duhen marrë masa më të gjera për të garantuar përgjegjësi dhe llogaridhënie.

Në disa qytete, përfshirë Beogradin dhe Novi Sadin, janë raportuar tensione mes protestuesve dhe forcave të sigurisë, të cilat kanë tentuar të shpërndajnë turmat.

Megjithatë, organizatorët e protestave theksojnë se lëvizja e tyre është paqësore dhe se synimi i tyre kryesor mbetet drejtësia dhe ndryshimi i politikave shtetërore.

Protestat pritet të vazhdojnë edhe në ditët në vijim, ndërsa qytetarët kërkojnë përgjigje të qarta dhe veprime konkrete nga autoritetet serbe. /Telegrafi/