Një djalë 12-vjeçar palestinez ka vdekur pasi u qëllua nga ushtarët izraelitë në Bregun Perëndimor, tha Ministria Palestineze e Shëndetësisë.
Mohammed Allamy ishte një pasagjer në një veturë që drejtohej nga babai i tij kur incidenti ndodhi në hyrje të qytetit Beit Ummar, në gjysmë të rrugës midis Betlehemit dhe Hebronit, sipas agjencisë zyrtare palestineze të lajmeve Wafa.
Raporti i agjencisë tha se 12-vjeçari u qëllua në gjoks dhe u dërgua në spital në Hebron, por ndërroi jetë disa orë më vonë, raporton cnn.
Ushtria izraelite tha se ishte në dijeni të pretendimeve se ushtarët e saj kishin vrarë një fëmijë dhe tha se ishte duke hetuar rrethanat e ngjarjes. Në një deklaratë të gjatë, ushtria tha se ushtarët iu afruan makinës pasi vëzhguan më parë banorët e saj duke u përpjekur të varrosnin trupin e një foshnje të porsalindur në një varr të cekët.
Trupat izraelite vunë re një automjet që po i afrohej zonës dhe arritën në përfundimin se ishte i njëjti automjet si më parë, thuhej në deklaratën e ushtrisë izraelite.
Deklarata e ushtrisë vazhdoi duke thënë se ushtarët ishin përpjekur të ndalonin veturën duke qëlluar në ajër, por ishte e kot dhe më pas erdhi deri te vrasja e adoleshentit. /Telegrafi/
