Uragani Dorian shkatërron gjithçka që i del përpara, 13 mijë shtëpi bëhen rrafsh me tokë – erërat fryjnë me shpejtësi prej 300 kilometra në orë

Uragani Dorian që ka goditur ishujt Bahama këtë mëngjes, raportohet se erërat e tij po lëvizin me shpejtësi prej mbi 300 kilometra në orë, duke shkatërruar shumë shtëpi, shtylla elektrike, e në anën tjetër qindra mijëra amerikanë janë duke u përgatitur të evakuohen pasi është paralajmëruar se uragani do të ndërrojë drejtim.

Dorian që po konsiderohet se është i nivelit të pestë, ka goditur më së shumti Grand Bahama, duke shkaktuar kështu dëme materiale siç janë 13 mijë shtëpitë e shkatërruara, derisa aeroporti tashmë është mbuluar nga uji, transmeton Telegrafi.

Si pasojë e erërave të forta mediat amerikane raportojnë se një djalë 7-vjeç është mbytur në ujin, që ka arritur në 40 centimetra nëpër rrugët e lagjeve të banuara. Ndërkaq ekspertët kanë paralajmëruar se stuhia mund t’i dërgojë dallgët e trazuara drejt zonave të banuara, duke bërë kështu që të rrezikohet edhe më shumë jeta e qytetarëve.

Sipas meteorologëve, uragani pritet të zhvendoset në Florida, ku banorët në Georgiia dhe Karolinën e Jugut janë paralajmëruar nga autoritetet lokale se vendet e tyre mund të goditen nga erërat e forta. Uragani Dorian konsiderohet si më i rrezikshmi në histori. /Telegrafi/