Udhëheqësit e BE-së në samit të posaçëm më 1 shkurt, planifikojnë të dorëzojnë 50 miliardë euro në Ukrainë

Kancelari gjerman Olaf Scholz dëshiron të ushtrojë presion të mëtejshëm mbi partnerët e Bashkimit Evropian (BE), për të ofruar më shumë armë në Ukrainë duke e ngritur çështjen në një samit të posaçëm të liderëve muajin e ardhshëm.

Udhëheqësit do të takohen në Bruksel më 1 shkurt, ku ata planifikojnë të miratojnë një paketë ndihme financiare për Kievin me vlerë 50 miliardë euro, transmeton Telegrafi.

Scholz synon të përdorë mundësinë për të zhvilluar një debat shtesë mbi mbështetjen ushtarake për Ukrainën që disa vende të BE-së po planifikojnë për këtë vit, konfirmoi një zyrtar gjerman për Politico.

Të hënën, Scholz lëshoi ​​një paralajmërim të drejtpërdrejtë se dërgesat e armëve në Ukrainë që shumica e vendeve anëtare të BE kanë dorëzuar deri më tani janë shumë të pakta.

Më pas ai u bëri thirrje aleatëve të tij në BE, që të rrisin kontributet e tyre në mbështetje të Ukrainës.

Scholz tha se i ka kërkuar BE-së të përpilojë një listë të të gjithë ndihmës ushtarake që vendet anëtare planifikojnë për këtë vit, jo më vonë se samiti i 1 shkurtit.

Plani i Berlinit për të diskutuar listën me liderët ka të ngjarë të rrisë presionin ndaj vendeve si Franca, Italia dhe Spanja, të cilat deri më tani kanë dhuruar relativisht pak mallra ushtarake për Kievin, të paktën sipas informacioneve të disponueshme publikisht.

Bazuar në të dhënat e Institutit të Kielit, i cili numëroi publikisht ndihmën ushtarake për Ukrainën, vitin e kaluar Gjermania ishte donatori i dytë më i madh pas SHBA-së, me 17.1 miliardë euro.

Pasohet nga Britania e Madhe me 6.6 miliardë euro dhe vendet nordike dhe lindore të BE -së. Franca, për krahasim, dha vetëm 0.54 miliardë euro, Italia 0.69 miliardë euro, dhe Spanja 0.34 miliardë euro. /Telegrafi/