Aktivistët anti-islam dhe protestuesit pro-myslimanë u përleshën të martën në Dearborn të Michiganit, duke shkaktuar një prani të madhe policore.
Dearborn, shtëpia e një prej popullatave më të mëdha myslimane në SHBA, është bërë kohët e fundit një shënjestër për aktivistët që e akuzojnë atë se vepron sipas "ligjit të Sheriatit", transmeton Telegrafi.
Përplasja filloi kur Jake Lang, i cili mori pjesë në trazirat e Kapitolit më 6 janar 2021, mbërriti në Michigan Avenue dhe u përpoq të digjte një Kuran.
Lang mbajti lart një çakmak duke u përpjekur t'i vinte flakën tekstit fetar, por protestuesit ia hoqën nga duart.
Më vonë, Lang e goditi Kuranin me një copë proshutë përpara se një protestues pro-myslimanë të rrëmbente librin dhe të largohej me të.
Lang dhe grupi i tij marshuan më vonë drejt bashkisë përpara mbledhjes së Këshillit të bashkisë të martën në mbrëmje.
Policia mbajti një perimetër në trotuare dhe përgjatë Michigan Avenue, duke ndërhyrë shkurtimisht kur përplasja u përshkallëzua pas përpjekjes së Lang për të djegur librin.
Një person u pa duke u arrestuar në bashkinë e qytetit. Nuk u raportuan të lënduar.
Kryetari i Partisë Demokratike të Miçiganit, Curtis Hertel, dënoi përpjekjen për djegien e Kuranit.
"Përpjekja për të djegur një dokument fetar është një akt i papranueshëm urrejtjeje. Dearborn është një qytet i dashur dhe multikulturor me dhjetëra mijëra njerëz që janë miq, anëtarë të familjes dhe fqinjë të çmuar", tha Hertel në një deklaratë. /Telegrafi/
- YouTube www.youtube.com
