Trump pritet ta emërojë Kari Lake si drejtoreshë të Zërit të Amerikës

Presidenti i sapozgjedhur Donald Trump pritet ta emërojë Kari Lake si drejtoreshë të ardhshme të  Zërit të Amerikës, duke vendosur një besnike të fortë në krye të transmetuesit të financuar nga Kongresi, që ofron raportime të pavarura të lajmeve në mbarë botën.

Lake, e cila kandidoi pa sukses për guvernatore të Arizonës dhe një vend në Senat, ishte një spikere e lajmeve televizive në Phoenix për gati tre dekada, derisa u largua në 2021 pasi bëri një sërë deklaratash të diskutueshme në mediat sociale, duke përfshirë ndarjen e dezinformatave të Covid-19 gjatë pandemisë.

Ajo nisi karrierën e saj politike pak kohë më vonë, duke krijuar me shpejtësi një profil besnik dhe kombëtar, teksa u përplas me gazetarët dhe i bëri jehonë Trumpit në kritikat e saj ndaj atyre që ajo i quajti “lajme të rreme”.

Në vitin 2022, ajo tha se do të ishte “makthi më i keq” i një gazetari nëse fiton garën për t’u bërë guvernatorë e Arizonës.

Ajo u bë e dashur për Trump përmes angazhimit të saj dogmatik ndaj gënjeshtrës se si ajo ashtu edhe Trump ishin viktima të mashtrimit zgjedhor.

Lake kurrë nuk e ka pranuar humbjen e saj në garën e guvernatorit të vitit 2022 dhe humbi garën e saj për Senatin muajin e kaluar, me një diferencë edhe më të madhe. Trump e konsideroi atë si kandidate për zëvendëspresidente përpara se të vendoste për JD Vance.

Trump në të kaluarën ka qenë një kritik i ashpër i Zërit të Amerikës, duke përfshirë në vitin 2020 duke thënë se “gjërat që ata thonë janë të neveritshme për vendin tonë”.

Transmetuesi tërhoqi kritika shtesë gjatë mandatit të parë të Trump për mbulimin e tij të ditëve të para të pandemisë së koronavirusit, me një botim të Shtëpisë së Bardhë që e akuzonte atë për përdorimin e parave të taksapaguesve “për të folur për regjimet autoritare” sepse mbulonte heqjen e bllokimit në qytetin kinez të Wuhan, ku u shfaq për herë të parë virusi.

Zëri i Amerikës u themelua gjatë Luftës së Dytë Botërore dhe statuti i tij i Kongresit, kërkon që ai të prezantojë lajme dhe informacione të pavarura për audiencën ndërkombëtare.

Me marrjen e detyrës në janar 2021, administrata e presidentit Joe Biden hoqi me shpejtësi një numër zyrtarësh të lartë të lidhur me Trump nga Zëri i Amerikës dhe pozicionet e lidhura me të. /Telegrafi/