Tre muaj më parë u filmua “duke hedhur në greminë një ari” – arusha gjendet e ngordhur në një shpellë në Spanjë

Mbrojtësit spanjollë të kafshëve të egra kanë gjetur trupat e dy këlyshëve të arushës së murrmë dhe nënës së tyre.

Bëhet fjalë për kafshën (nënën e këlyshëve), e cila mendohet të ketë qenë e njëjta kafshë e filmuar tre muaj më parë duke dërguar një ari drejt ngordhjes në një greminë pasi e sulmoi.

Ekspertët gjetën trupat e femrës dhe këlyshëve të saj në fund të një të çare 33 metra brenda një shpelle në rajonin verior të Castile dhe León të premten.

Ekipet kishin qenë në kërkim të kafshëve që nga 5 qershori, kur arusha dhe një nga pasardhësit e saj u sulmuan nga një ari që dukej se donte të vriste këlyshin në mënyrë që të çiftëzohej me nënën e tij.

Një video e betejës, e xhiruar nga dy alpinistë, tregoi nënën duke shtyrë mashkullin shumë më të madh përpara se dyshja të “zhytej” dhjetëra metra poshtë një shpati mali shkëmbor në Palencia.

Ariu – i cili peshonte 217 kg – ngordhi nga plagët e tij, ndërsa nëna e gjakosur dhe e plagosur rëndë dhe një nga këlyshët e saj u strehuan në një shpellë aty pranë.

“Në fillim të 6 qershorit, ne arritëm të gjenim trupin e një ariu të ngordhur pranë skenës së rënies”, tha në një deklaratë ministria e mjedisit e Castile dhe León.

“Gjatë ditëve në vijim, ne gjithashtu konfirmuam se arusha dhe këlyshi i saj ishin gjallë rreth 15 metra brenda shpellës. Pasi u përcaktua se ata ishin ende gjallë, ushqim dhe ujë u vendosën në shpellë për t’i ndihmuar ata të shëroheshin me sa më pak ndërhyrje”.

Por, me kalimin e ditëve, shenjat e jetës u zbehën dhe ekipet përdorën një dron dhe një kamerë për të gjetur kafshët.

Më 2 shtator, ata gjetën trupat e tre arinjve thellë brenda të çarës, e cila ishte vetëm 50 centimetra e gjerë.

Trupat janë dërguar në një qendër të specializuar të kafshëve të egra, ku do të kryhen autopsitë për të konfirmuar prejardhjen e këlyshëve dhe mënyrën se si ata ngordhën. /Telegrafi/