Tesla është vetura më e shitur në SHBA, por edhe për sa kohë?

Modelet e reja të automjeteve elektrike nga disa prodhues automjetesh kanë filluar të gërryejnë dominimin e Teslas në tregun e automjeteve elektrike në Shtetet e Bashkuara, sipas agjencisë shtetërore të regjistrimit të automjeteve të vendit.

Hulumtimi nga S&P Global Mobility tregon se Tesla ende kontrollon rreth 65 për qind të tregut në rritje të automjeteve elektrike gjatë nëntë muajve të parë të këtij viti.

Konkurrentët kanë bërë fitime në shitjet e produkteve që kushtojnë nën 48 mijë euro, një kategori në të cilën kompania amerikane mezi konkurron.

Nga viti 2018 deri në vitin 2020, Tesla kishte rreth 80 për qind të tregut të automjeteve elektrike, por pjesa e saj ra në 71 për qind në vitin 2021 dhe vazhdoi të bjerë, njoftoi S&P.

“Pozicioni i Teslas po ndryshon pasi po arrijnë opsione të reja, më të përballueshme që ofrojnë teknologji dhe prodhim të barabartë ose më të mirë. Ndërsa zgjedhja e konsumatorëve dhe interesi i konsumatorëve për automjetet elektrike rritet, aftësia e Teslas për të mbajtur një pjesë dominuese të tregut do të sfidohet në të ardhmen”, thuhet në deklaratë.

Nga 525 mijë automjete elektrike të regjistruara gjatë nëntë muajve të parë të këtij viti, rreth 65 për qind, ose 340 mijë ishin Teslas, sipas S&P.

Pavarësisht pjesës më të vogël të tregut, Tesla do të vazhdojë të shohë rritje të shitjeve ndërsa interesi i konsumatorëve po rritet.

Mungesa e çipave kompjuterikë dhe pjesëve të tjera kanë penguar shumë konkurrentë si Ford, General Motors, Hyundai, Kia dhe Volkswagen që të drejtojnë fabrikat me kapacitet të plotë për të përmbushur kërkesën.

S&P tha se aktualisht ka 48 modele makinash elektrike në shitje në SHBA dhe pret që ky numër të rritet në 159 deri në fund të 2025. /Telegrafi/