“Tërheqja nga futbolli ishte më e vështirë për shëndetin tim mendor sesa beteja me tumorin në tru”- rrëfimi mes jetës dhe vdekjes nga Jose Enrique

“Këtë e kam thënë gjithmonë më parë. Në një farë mënyre jo fizikisht, por mendërisht, ishte më e vështirë të tërhiqesha sesa ajo që kalova me tumorin tim për të qenë i sinqertë me ju”.

Jose Enrique ka përjetuar mjaft dhimbje në vitet e fundit, derisa është një njeri frymëzues për personat e tjerë që vuajnë nga kjo sëmundje.

Pasi karriera e tij përfundoi mizorisht para kohe për shkak të lëndimit, ish-ylli i Ligës Premier u diagnostikua më pas me një tumor të rrallë të trurit më pak se një vit më vonë.

Për fat të mirë, 36-vjeçari pa dritë në fund të tunelit dhe në prill të vitit 2019 – 11 muaj pas diagnozës së tij të kordomës – Enrique u shërua plotësisht.

Që atëherë ka pasuar kontrolle të rregullta, por me kalimin e kohës, ish-mbrojtësi i Liverpoolit dhe Newcastle mund të kalojë nga një periudhë kaq e vështirë në jetën e tij.

Ai dhe gruaja Amy, të cilën e takoi kur luante në Angli, tani kanë një fokus të ri edhe në jetën e tyre.

Lexo po ashtu Ikona e Liverpoolit thotë se do të hidhet në pishinë lakuriq, nëse Mbappe kalon në Anfield

Enrique njoftoi se ata janë në pritje të fëmijës së tyre të parë së bashku në Valencia, gjë që i ka dëshmuar ish-futbollistit se ai dhe familja e tij ende mund të gjejnë lumturinë e vërtetë në të ardhmen e tyre.

Megjithatë, do të kishte qenë e vështirë për Enrique ta besonte këtë vetëm disa vite më parë.

“Me daljen në pension – ishte ajo që bëja që kur isha gjashtë vjeç. Natyrisht, pasi isha një fëmijë i vogël, atëherë bëhesh profesionist, shijon jetën duke bërë atë që të pëlqen më shumë – kjo është të luash futboll. Dhe në rastin tim, ajo përfundoi për shkak të lëndimit, dhe jo sepse doja”, deklaroi Enrique ekskluzivisht për Daily Star Sport.

“Është e vështirë në një farë mënyre kur vendos të tërhiqesh, por unë vendosa sepse gjuri im nuk ishte në rregull. Ishte shumë, shumë e vështirë për ta pranuar këtë”.

“Në aspektin mendor, me shëndetin tim mendor, kisha probleme me të. Është shumë e vështirë të përballesh me jetën ‘normale’. Është shumë, shumë e vështirë të gjesh sërish diçka për të cilën ke pasion. Do t’ju duhet të pranoni se nuk do të jetë kurrë diçka e afërt me atë se sa i apasionuar keni qenë për futbollin. Duhet ta pranosh këtë, dhe kjo është gjëja më e vështirë”.

“Megjithatë, ju mund të gjeni lumturinë dhe të jeni të lumtur në jetën tuaj”.

Enrique kaloi katër sezone me Newcastle dhe i ndihmoi ata të riktheheshin në Ligën Premier përpara se të bashkohej me Liverpoolin dhe fitoi disa trofe gjatë periudhës së tij në Anfield.

Në tre sezonet e tij të fundit me Reds, Enrique arriti vetëm 21 paraqitje pasi lëndimet bënë punën e tyre.

Një gju i lënduar rëndë e pllakosi atë në vitet e mëvonshme, përpara se një ndeshje e shkurtër në Spanjë me Real Zaragoza të sinjalizonte pensionimin e Enriques.

Lexo po ashtu Jose Enrique luajti për herë të parë qëkur e mposhti kancerin e rrallë në tru

Megjithatë, duke parë kohën e tij në Ligën Premier, Enrique ka vetëm kujtime pozitive dhe ka ende një marrëdhënie të fortë veçanërisht me Liverpoolin.

“Natyrisht që kam fituar kampionatin me Newcastlen, kam fituar Carabao Cup me Liverpoolin”, shtoi ai. “Është bukur t’i kesh ato, jo vetëm për ne, por për klubin dhe tifozët, është histori, kjo është e mrekullueshme”.

“Por, më e rëndësishmja për mua, dhe ju e vlerësoni edhe më shumë kur dilni në pension, është gjëja e përditshme. Të luaja në Anfield, të luaja në St James’ Park, me tifozët – kur isha shumë mirë me të dy klubet, si më trajtuan, dhe ata akoma më trajtojnë, nga të dy klubet. Kjo është ajo që unë marr. Dashuria e fansave. Dashuria e klubeve dhe nga njerëzit brenda tyre”.

“Natyrisht, në këtë rast, unë kam më shumë një marrëdhënie me Liverpoolin sesa Newcastlen për shkak të pronësisë (Mike Ashley) që ishte atje më parë. Marrëdhënia ime me Liverpoolin është e bukur për shkak të asaj që kam bërë në të kaluarën, dhe falë kësaj, isha shumë, shumë i lumtur në jetën time atje”.

“Kam pasur kaq shumë eksperienca atje, kam mësuar shumë si burrë sepse jam larguar nga shtëpia në moshë shumë të vogël, djalë shumë i papërvojë”.

“Më pas takova edhe gruan time – duhej të ishte angleze personi që pushtoi zemrën time, është çmenduri! Më duhej të shkoja në Angli për të takuar dashurinë e jetës sime”, shtoi ai më tej. /Telegrafi/