Të paktën nëntë të vdekur pas protestave që tronditën Senegalin ndërsa lideri i opozitës u dënua me burg

Të paktën nëntë persona u vranë në Senegal në përleshjet midis policisë së trazirave dhe mbështetësve të liderit të opozitës Ousmane Sonko pasi një gjykatë e dënoi atë me dy vjet burg.

Përplasjet shpërthyen pas verdiktit të së enjtes, i cili mund të skualifikojë Sonkon, kundërshtarin më të ashpër të presidentit Macky Sall, nga konkurrimi në zgjedhjet presidenciale të vitit të ardhshëm, shkruajnë mediat e huaja, përcjell Telegrafi.

Makinat dhe autobusët u dogjën në kryeqytetin Dakar dhe tensione u raportuan diku tjetër, duke përfshirë qytetin Ziguinchor, ku Sonko ka qenë kryetar bashkie që nga viti 2022.

“Ne kemi vërejtur, me keqardhje, dhunën që ka çuar në shkatërrimin e pronës publike dhe private dhe, për fat të keq, në nëntë vdekje në Dakar dhe Ziguinchor”, ka thënë ministri i Brendshëm, Antoine Diome në televizionin kombëtar të premten.

Sénégal: de violents affrontements font 9 morts, après la condamnation du principal opposant à la présidentielle pic.twitter.com/cpwdcPDyX8

— BFMTV (@BFMTV) June 2, 2023

Sonko, 48 vjeç, nuk mori pjesë në seancën për një sulm të dyshuar seksual, ku ai u akuzua për përdhunimin e një gruaje që punonte në një sallon masazhi në vitin 2021, kur ajo ishte 20 vjeçe, dhe për kërcënime me vdekje ndaj saj.

Ai mohoi keqbërjen dhe tha se akuzat ishin të motivuara politikisht.

Gjykata e liroi Sonkon nga akuza për përdhunim, por e shpalli atë fajtor për një vepër të veçantë të përshkruar në kodin penal si sjellje imorale ndaj individëve më të rinj se 21 vjeç.

Ministria e drejtësisë tha se lideri i opozitës tani mund të çohet në burg në çdo kohë.

Ndërkohë bëhet e ditur se policia mbeti e vendosur rreth shtëpisë së tij në Dakar ndërsa trazirat filluan në kryeqytet dhe gjetkë pas vendimit. /Telegrafi/