Të kujt ishin armët e gjetura në rezidencën e presidentit të ndjerë Ibrahim Rugova?

Dy armë të kalibrit të vogël janë gjetur në rezidencën e dikurshme të presidentit Ibrahim Rugova.

Një pistoletë Sig Sauer 9×19 mm dhe një revolver Zastava M83/92 Magnum 357, 50 janë konfiskuar gjatë bastisjes që kishte ndodhur më 5 dhe 6 shkurt 2014 në Rezidencën e ish-presidentit Rugova, që tash është në pronësi të familjes së tij dhe e shpallur nga Ministria e Kulturës monument i Trashëgimisë Kulturore, shkruan ORAinfo.

Por të kujt ishin armët?

Në këtë shtëpi tani jetojnë deputetja Teuta Rugova, zëvendësministri i Ambientit, Mendim Rugova me familje dhe Fana, bashkëshortja e presidentit të ndjerë.

Ndonëse të gjithë anëtarët e familjes së presidentit më pacifist të njohur ndonjë herë, jetojnë në atë shtëpi, prokuroria pretendon që armët i takojnë djalit të vogël të presidentit, Ukë Rugovës.

Ky i fundit mohon t’i takojnë atij apo ndonjë pjesëtari tjetër të familjes Rugova.

Sipas tij këto armë janë pjesë e trashëgimisë kulturore që i takojnë epokës së presidentit Rugova.

“Këto kanë qenë armë të gardës së presidentit Rugova”, ka thënë Ukë Rugova.

Këto armë dhe gjëra të tjera, që i kanë takuar në atë kohë gardës së presidentit Rugova, sipas Ukës, familja ka qenë e pajtimit t’i ruaj si eksponate dhe t’i ruaj ato në shtëpinë Monument të Trashëgimisë Kulturore të shpallur nga Ministria e Kulturës.

“Në të ardhmen rezidenca e presidentit Rugova mëtohet të bëhet Shtëpi Muze dhe aty është planifikuar që pos këtyre armëve të vendosen edhe eksponate të tjera që dikur i takonin Gardës, të cilat gjithashtu gjenden në Rezidencë”, ka thënë Ukë Rugova.