A do të hapet Ura e Ibrit? – flasin qytetarët e Mitrovicës

Një ditë më parë u publikua raporti i cili vlerëson stabilitetin e Urës së Ibrit për qarkullimin e veturave. E, kjo çështje është një nga më të diskutuarat në vend.

Edhe pse Qeveria e Kosovës mbetet e vendosur që ura duhet të hapet, një gjë të tillë po e kundërshtojnë ndërkombëtarët, pasi siç thonë “kjo temë duhet të diskutohet në dialogun Kosovë-Serbi”.

Por, çfarë mendojnë qytetarët e Mitrovicës për këtë temë dhe sa e rëndësishme është hapja e kësaj ure për ta 25 vjet pas luftës?

Qytetari, Halit Ymeri është i mendimit që të hapet ura për qarkullimin e veturave.

“Mirë është mu hap këtu qarkullimi. Këtu janë dy ura, po këtu politika po e bën të veten. Pa marrëveshje të ndërkombëtarëve këtu këtë urë s’mund me hap kurrkush. Ti hape sa të duash, KFOR-i nuk largohen”, tha ai duke shtuar se edhe trafiku lirohet nëse hapet ura e Ibrit.

Edhe Agron Gacaferri banor i Mitrovicës tha se ura e Ibrit duhet të hapet për qarkullim të veturave.

“S’ka pas askush fuqi deri sa erdhi Albini. Ne të vonshëm jemi ende. Edhe populli pak ka interes me dal në këtë urë siç po e shoh. Qysh ka kalu KFOR-i me veturat e tyre edhe për ne bën…”, ka thënë Gacaferri.

Lexo po ashtu Del raporti: Ura e Ibrit është stabile, e qëndrueshme dhe funksionale për qarkullimin e veturave

Hilmushe Ismajli e cila banon në lagjen e Boshnjakëve në veri të Mitrovicës u shpreh e kënaqur që po diskutohet çështja e hapjes së urës së Ibrit.

“Jena shumë të kënaqur e ishalla don Zoti lirohet dhe ura e Ibrit, bahet mirë për krejt…mos me pas asnjë incident…”, ka thënë ajo.

Ndryshe, Ministria e Infrastrukturës ka publikuar raportin që vlerëson stabilitetin e Urës së Ibrit për qarkullimin e automjeteve, e cila i hap rrugën autoriteteve kosovare për ta hapur urën, siç kanë synuar javët e fundit nga Qeveria e Kosovës.

E po, të martën kryeministri i vendit Albin Kurti, priti në takim Komandantin e KFOR-it, Özkan Ulutas me të cilin bisedoi edhe për hapjen e urës kryesore mbi lumin Ibër në Mitrovicë si një gjë e drejtë, e nevojshme dhe e dobishme.

Por, përmes një njoftimi për media nga KFOR reaguan duke thënë se ky mision ka ripohuar përkushtimin e palëkundur për të kontribuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë, në mënyrë të paanshme dhe në çdo kohë.

Lexo po ashtu KFOR-i kërkon përmbajtje: Nuk hezitojmë të veprojmë, jemi gjithandej Kosovës

KFOR-i gjithashtu apeloi për përmbajtje nga deklaratat dhe veprimet e njëanshme që mund të krijojnë tensione, duke theksuar rëndësinë e stabilitetit për sigurinë e qëndrueshme në të gjithë Kosovën dhe për stabilitetin rajonal. /Telegrafi/