Tahiri, Qeverisë: Ku është Ligji i Pagave dhe kur do të miratohet?

Shefi i grupit parlamentar të Aleancës për Ardhmërinë e Kosovës, Besnik Tahiri, ka pyetur publikisht Qeverinë se kur pritet të miratohet Ligji i Pagave.

Përmes një postimi në Facebook, Tahiri ka thënë se është bërë një muaj prej kur Qeveria është dashur të sjell në Kuvend këtë ligj, ndërsa ka shtuar se janë mbi 80 mijë zyrtarë publikë që po presin miratimin e tij.

“Është bërë një muaj prej kur Qeveria e Kosovës është dashur të sjell në Kuvend Ligjin e Pagave, kjo tashmë është shtyrja e tretë brenda një viti qeverisës. Sot, mbi 80 mijë zyrtarë publikë, krejtësisht në mjegull e paqartësi me të drejtë pyesin, a është kjo pazotësi, apo mashtrim i radhës?”.

Lexo po ashtu Ligji i pagave afër draftimit - larg zbatimit

“Jeni vonuar shumë, na duhet menjëherë përgjigje, ku është ligji dhe kur do të miratohet?”, ka shkruar deputeti opozitar.

Ndryshe, Ministri i Punëve të Brendshme, Xhelal Sveçla, gjatë raportimit në Komisionin për Administratë Publike të mërkurën, ka deklaruar se Projektligji i Pagave është në fazën e vlerësimeve të fundit në Ministrinë e Financave.

Sa i përket vonesave për miratimin e këtij Projektligji, Sveçla tha se janë bërë me arsyen e vetme – “po punojmë për një ligj që mbulon gjithë sferën e nevojave të secilit institucion, ku pastaj do të sillte një lloj barazie”./Telegrafi/