Superliga e Maqedonisë shkon në pauzë dy javore me dominim të ekipeve shqiptare

Xhiroja e 14-t në Superligën e Maqedonisë së Veriut mbyllet në krye me Shkupin, Shkëndijën dhe Struga Trim Lumin.

Tre ekipet shqiptare vazhdojnë dominimin në futbollin e Maqedonisë edhe këtë sezon.

Struga kampion në fuqi, ndërsa Shkupi dhe Shkëndija lider të renditjes në këtë sezon, me një pikë më shumë se struganët. Ekipi Shpëtim Duros u mposht në fundjavë nga Brera Strumica, njejtë sikur Shkupi që u mund në Kratovë nga Sileksi, teksa fitore regjistroi vetëm Shkëndija që mposhti Tikveshin në Tetovë. Por, megjithatë kjo nuk ka ndikuar në renditjen e tyre në maje të tabelës.

Pas Shkupit, Shkëndijës dhe Strugës, vjen Sileksi me 23 pikë, duke u ndjekur nga Brera Strumica dhe Rabotniçki që kanë nga 19 pikë. Gostivari ka marrë pozitën e shtatë me 18 pikë të grumbulluara, ndërsa Tikveshi dhe Voska renditen në vendet tetë dhe nëntë me nga 16 pikë.

Pozita e 10-të i takon Makedonija Gjorçe Petrovit me 15 pikë, një më shumë se Bregallnica dhe katër më shumë se Vardari që vazhdon ta mbajë pozitën e fundit në renditjen tabelare.

Xhiroja e radhës në Superligën e Maqedonisë së Veriut është me 26 nëntor./Telegrafi/