Stoltenberg udhëton për në Turqi, do të tentojë ta bindë Erdoganin të lejojë pranimin e Suedisë dhe Finlandës në NATO

Sekretari i Përgjithshëm i NATO-s, Jens Stoltenberg, tha sot se do të udhëtojë nesër në Turqi për të konfirmuar mbështetjen e Aleancës për Turqinë pas tërmetit shkatërrues, dhe të avokojë për ratifikimin e anëtarësimit të Suedisë dhe Finlandës në këtë organizatë.

“Unë shkoj nesër në Turqi për t’i shprehur presidentit Erdogan mbështetjen e Aleancës”, tha ai në një konferencë shtypi në Bruksel, pas takimit të ministrave të Mbrojtjes, transmeton Telegrafi.

Stoltenberg shtoi se do të diskutojë edhe për anëtarësimin e Suedisë dhe Finlandës në NATO.

“Unë do t’u kërkoj atyre të ratifikojnë të dy protokollet e pranimit në të njëjtën kohë. Por i takon Turqisë të vendosë nëse do të ratifikojë një ose të dy protokollet,” shtoi ai.

Lexo po ashtu Në takimin dyditor të ministrave të Mbrojtjes të NATO-s, nuk u arrit pajtim për dërgimin e aeroplanëve në Ukrainë

Presidenti turk Recep Tayyip Erdogan tha për herë të parë në fillim të shkurtit, se parlamenti turk mund të ratifikojë pranimin e Finlandës në NATO pa Suedinë. Tridhjetë vende kanë nënshkruar protokollet e anëtarësimit, dhe 28 i kanë ratifikuar ato. Vetëm Turqia dhe Hungaria nuk e kanë ratifikuar ende traktatin e tyre.

“Çështja kryesore nuk është nëse pranimi i Finlandës dhe Suedisë do të ratifikohet së bashku, por se të ndodhë sa më shpejt që të jetë e mundur”, tha Stoltenberg dje në takimin e ministrave të Mbrojtjes të NATO-s në Bruksel.

Vendimi i autoriteteve suedeze për të lejuar një protestë para ambasadës turke në Stokholm, ku u dogj një Kuran, ka zemëruar Ankaranë. Shumica e finlandezëve janë pro anëtarësimit të vendit në NATO pa pritur Suedinë. Por liderët e dy vendeve duan të hyjnë së bashku në NATO.

Lexo po ashtu Erdogan: Shpresoj se do t'i kapërcejmë këto ditë të vështira

Organizimi i zgjedhjeve presidenciale dhe parlamentare në Turqi në maj mund të vonojë ratifikimin, pasi parlamenti pushon së funksionuari në mars. Por zgjedhjet mund të shtyhen për shkak të tërmetit në jug të vendit.

Suedia dhe Finlanda janë tashmë shumë të integruara në NATO. Marrin pjesë në të gjitha takimet duke përfshirë komitetin ushtarak dhe kanë marrë garanci sigurie nga SHBA, Gjermania, Franca, Mbretëria e Bashkuar, Italia, Polonia dhe Holanda deri në hyrjen në Aleancë. /Telegrafi/