Sondazhi i ri – Vetëm Michelle Obama do të fitonte kundër Donald Trumpit nëse nuk kandidon Joe Biden

Në rast se Joe Biden heq dorë prej kandidaturës për president të SHBA-së pas një paraqitjeje katastrofike në debatin e javës së kaluar kundër kandidatit republikan, Donald Trump, ish-Zonja e Parë, Michelle Obama është e vetmja kandidate e mundshme demokrate që do ta mundte pa problem ish-presidentin amerikan, Trumpin, sipas sondazheve të Ipsos.

Michelle Obama kryeson gjithashtu renditjen midis votuesve të regjistruar, e cila lë pas Trumpin dhe Bidenin me më shumë se 10 për qind. Kur u pyetën nëse Trump apo Biden duhet të heqin dorë nga kandidatura e tyre pas debatit, pothuajse tre nga pesë të anketuar janë dakord që Biden duhet të largohet dhe pak më pak se gjysma thanë të njëjtën gjë për Trumpin.

Lexo po ashtu Gjashtë emrat që mund ta zëvendësojnë Bidenin si kandidatë të demokratëve për president

Trump dhe Biden mbeten të barabartë mes votuesve të regjistruar për zgjedhjet presidenciale të muajit nëntor. Në ballafaqimet e tjera hipotetike demokrate kundër Trumpit, vetëm Michelle Obama është më e mirë se republikani në mesin e votuesve të regjistruar.

Kur u pyetën se për kë do të votonin në zgjedhjet presidenciale në muajin nëntor, 40 për qind e votuesve të regjistruar do të votonin për Bidenin dhe po aq për Trumpin. Ky raport në fakt ka qenë i qëndrueshëm që nga fundi i muajit maj i vitit 2024, kur 41 për qind e tyre ishin për Bidenin dhe 39 për qind për Trumpin.

Kur u pyetën për kandidatët e mundshëm demokratë kundër Trumpit, 50 për qind e votuesve të regjistruar thonë se do të votonin për Michelle Obama dhe vetëm 39 për qind për Trumpin.

Të gjithë kandidatët e tjerë të mundshëm demokratë kanë rezultate të ngjashme ose më të këqija se Bideni kundër Trumpi.

Zëvendëspresidentja Kamala Harris do të merrte mbështetjen e 42 për qind të votuesve të regjistruar krahasuar me 43 për qind të Trumpit. Guvernatori i Kalifornisë, Gavin Newsom do të fitonte 39 për qind të votuesve të regjistruar krahasuar me 42 për qind të Trumpit. Të gjithë kandidatët e tjerë demokratë kanë ndërmjet 34 për qind dhe 39 për qind të votave të mundshme mes votuesve të regjistruar.

Lexo po ashtu Harris beson se ajo duhet ta zëvendësojë Bidenin në zgjedhjet presidenciale të SHBA-së

Michelle Obama është gjithashtu e vetmja nga të gjithë kandidatët e ofruar në sondazh që gëzon opinionin pozitiv të më shumë se gjysmës së të anketuarve. Për 55 për qind të të anketuarve, Obama është një politikan pozitiv.

Megjithatë, duhet theksuar se ish-Zonja e Parë disa herë ka deklaruar qartë se nuk ka ndërmend të kandidojë në zgjedhje, ndërsa më herët e quajti punën e presidentit stresuese dhe rraskapitëse dhe diçka që “nuk do të donte ta përballonte vetë”. /Telegrafi/