Skena të rralla nga Florida – stuhi dëbore mbuloi parajsën tropikale, dimër i paharrueshëm

Ajri i ftohtë arktik përfshiu më shumë se gjysmën e Shteteve të Bashkuara të Amerikës, duke sjellë një valë temperaturash jashtëzakonisht të ulëta.

Kushtet dimërore prekën edhe jugun e largët, përfshirë New Orleansin, ku u regjistruan reshjet më të mëdha të borës në disa dekada.

Në disa shtete federale, për shkak të ngricave dhe shiut të akullt, u mbyllën aeroportet, shkollat, institucionet shëndetësore dhe rrugët kryesore.

Ajri i ftohtë ekstrem përfshiu një zonë ku jetojnë më shumë se 170 milionë amerikanë.

Ditët e kaluara, temperaturat e ulëta shkaktuan pasoja të shumta për komunitete të ndryshme, përfshirë Washington-in, ku për shkak të kushteve të motit ceremonia e inaugurimit të presidentit amerikan, Donald Trump u zhvendos brenda ndërtesës së Kongresit.

Shërbimi Kombëtar Meteorologjik (NWS) paralajmëroi të martën se pjesa më e madhe e vendit po përballet me mot tepër të ftohtë.

Janë lëshuar paralajmërime për mot ekstrem në disa pjesë të tetë shteteve në juglindje të SHBA-së, ku mund të regjistrohen temperatura rekord të ulëta. Aktualisht, temperaturat në një pjesë të madhe të vendit janë rreth 17 gradë nën mesataren.

Si pasojë e të ftohtit, deri tani kanë humbur jetën katër persona – dy raste të lidhura me të ftohtin po hetohen në Austin, Texas, ndërsa dy raste të tjera të hipotermisë janë raportuar në Georgia dhe Milwaukee.

Paralajmërime për ngrica në vend të klimës së butë dhe tropikale

Në jug të SHBA-së, veçanërisht përgjatë Gjirit, ku njerëzit janë mësuar me klimë të butë dhe tropikale, autoritetet paralajmërojnë banorët për rrezikun e ngricave dhe hipotermisë.

Në New Orleans, qytet që shpesh përballet me uragane tropikale, ranë më shumë se 15 centimetra borë, duke tejkaluar rekordin e mëparshëm të vitit 1948, njoftoi NWS.

Disa centimetra më shumë u regjistruan në perëndim të qytetit, ku autoritetet për herë të parë lëshuan një paralajmërim për stuhi bore në disa qarqe të Louisianës, shkruajnë mediat.

Të martën, të gjitha fluturimet komerciale në aeroportin e New Orleansit u anuluan, njësoj si në Houston, Texas.

Në Tallahassee, Florida, fluturimet u pezulluan më herët. Në total, më shumë se 2200 fluturime u anuluan në të gjithë SHBA-në, ndërsa 3000 të tjera u vonuan, sipas platformës për ndjekjen e fluturimeve, Flight Aware.

Borë në Florida, Georgia dhe Karolina

Një stuhi e madhe dimërore që goditi Texasin dhe mbuloi veriun e Gjirit me sasi rekord dëbore, gjatë natës u zhvendos drejt lindjes. Reshje të dendura dëbore, ngrica dhe shi i akullt prekën pjesë të Florida Panhandle, Georgias dhe Karolinës së Veriut dhe Jugut.

Paralajmërime për mot të keq janë në fuqi edhe për qytete të mëdha si Jacksonville, Florida. Pritet borë deri të mërkurën, shoqëruar me paralajmërime për ngrica dhe akull. Për shkak të motit të keq, aeroporti ndërkombëtar në Jacksonville u mbyll, mësimi në shkolla u anulua dhe zyrat qeveritare mbetën të mbyllura edhe të mërkurën.

Moti jashtëzakonisht i ftohtë po kërcënon edhe shtetet veriore, si dhe provincat kanadeze Ontario dhe Quebec, ku për shkak të erës së ftohtë, ndjesia e temperaturës mund të zbresë në -50 gradë Celsius.

Stuhia dimërore solli dhjetëra centimetra borë edhe në pjesë të shtetit të New Yorkut, ku guvernatorja Kathy Hochul shpalli gjendje të jashtëzakonshme në dhjetëra qarqe për shkak të borës dhe të ftohtit ekstrem.

Kushtet atmosferike në rajon shkaktohen nga një masë ajri arktik që është përhapur nga Kanadaja drejt jugut, në kombinim me ajër të lagësht dhe presion të ulët atmosferik. /Telegrafi/