Skandal në Holandë, Heerenvenit i iku fitorja nga dora pasi kundërshtari barazoi me 12 lojtarë në fushë

Një skandal ka ndodhur në elitën e futbollit holandez Eredivisie në ndeshjen mes Heerenveen dhe Fortuna Sittard që përfundoi baras 2-2.

Trajneri i Heerenveen, Robin van Persie, u shpreh i acaruar pas një incidenti të çuditshëm gjatë ndeshjes kundër Fortuna Sittard të shtunën, ku skuadra kundërshtare luajti për një kohë me 12 lojtarë në fushë.

Situata ndodhi në minutën e 88-të, kur Heerenveen po udhëhiqte me rezultatin 2-1. Fortuna Sittard bëri një zëvendësim të dyfishtë, duke sjellë në fushë Darijo Grujcic dhe Owen Johnson në vend të Ryan Fosso dhe Jasper Dahlhaus. Megjithatë, Dahlhaus nuk doli nga fusha menjëherë dhe skuadra mysafire luajti për afërsisht një minutë me 12 lojtarë.

Krankzinnig moment: Fortuna Sittard staat met 12 spelers op het veld en scoort vlak daarna 🤨#heefor

— ESPN NL (@ESPNnl) February 1, 2025

Van Persie vuri re këtë gabim dhe protestoi me forcë në fushë, duke kërkuar që situata të korrigjohej. Pasi Dahlhaus u largua përfundimisht, Fortuna Sittard arriti të barazonte nga një rivënie këndore në minutën e 89-të, duke rrëmbyer një pikë të çmuar.

Pas ndeshjes, Van Persie ishte shumë i acaruar me atë që ndodhi në fushë.

“Unë e pashë atë që i parapriu atij goli shumë të veçantë. Fortuna Sittard kishte 12 lojtarë në fushë për një minutë para asaj rivënieje. Me sa duket, kjo është e lejuar dhe e mundur. Nuk mund ta imagjinoni këtë? Që thjesht lejohet”.

“Normalisht, unë kurrë nuk flas me gjyqtarët dhe gjithmonë i lë ata të bëjnë punën e tyre, por kjo është e paimagjinueshme. Ata luajtën me 12 lojtarë kundër nesh. Kështu që pyeta gjyqtarin e katërt: ‘A nuk duhet të bëni diçka për këtë?'”

Hier het moment te zien dat Fortuna Sittard met elf veldspelers in het veld stond🧐#heefor pic.twitter.com/mF4zU2LsDz

— ESPN NL (@ESPNnl) February 1, 2025

Kur u pyet se çfarë do të duhej bërë, Van Persie u shpreh i qartë: “Për shembull, të anulohet ai gol. Ju nuk mund të luani me 12 lojtarë kundër 11. Unë vërtet nuk mund ta kuptoj këtë. Mendoj se kjo është vërtet skandaloze”.

Ish-sulmuesi i Manchester United dhe Arsenal, i cili mori drejtimin e Heerenveen në maj të vitit të kaluar, po përballet me një sezon të vështirë. Skuadra e tij gjendet në vendin e 10-të në Eredivisie pas 21 ndeshjesh. /Telegrafi/