Shkup: Të dielën do të mbahet marsh në solidaritet me popullin e Palestinës

Të dielën në sheshin “Maqedonia” në Shkup do të mbahet marsh solidariteti me popullin e Palestinës, pas eskalimit të dhunës në Gaza nga forcat izraelite ditët e fundit.

Njoftimi është publikuar në rrjetet sociale, në të cilin thuhet se populli palestinez në Jerusalemin lindor ballafaqohet me spastrim etnik nga shteti i Izraelit, përcjell Telegrafi Maqedoni.

“Si rezultat i sulmeve dhe dhunës që përdorën autoritetet izraelite, vetëm këtë javë janë vrarë mbi 30 palestinez, prej të cilëve 14 fëmijë, ndërsa kanë mbetur edhe qindra të lënduar. Përveç kësaj, dhuna sistematike është edhe në dëbimin dhe uzurpimin e shtëpive të palestinezëve në Jerusalem, dhe për këtë arsye duhet ndërkombtarisht të kundërshtojmë këtë shtypje”.

“Në shenjë solidariteti me popullin palestinez dhe rezistencën e tyre, të dielën në ora 12:00 do të mbahet marsh protestues në sheshin “Maqedonia”. Rikujtojmë për respektim të masave për mbrojtje shëndetësore, të parapara nga autoritetet”, thuhet në njoftimin në Facebook.

Ndryshe, marshe të tilla ditëve të fundit janë organizuar në shumë shtete evropiane, ndërsa sot (e premte) është mbajtur edhe në Kosovë./Telegrafi/