Shkëlqeu në krahun e majtë të mbrojtjes, Qlirim Avdulli pika e fortë e Ferizajt në stinorin vjeshtor

Ferizaj e ka mbyllur me fitore stinorin vjeshtor në Albi Mall Superligën e Kosovës, pasi triumfuan ndaj Gjilanit me rezultat 2-1.

Pas 18 ndeshjeve të zhvilluara këtë stinor vjeshtor, ‘Ujqit’ zënë vendin e tetë në renditje ku kanë grumbulluar 20 pikë.

E një nga futbollistët më të dalluar te skuadra e Arsim Abazit padyshim ka qenë mbrojtësi i majtë, Qlirim Avdulli.

Përveç paraqitjeve fantastike që ka bërë në repartin defensivë, Avdulli ka dhënë kontribut të jashtëzakonshëm edhe në ofensivë me harkime të rrezikshme në zonë, asistime dhe një penallti të fituar.

25-vjeçari ka qenë vendimtar qysh nga ndeshja e parë ndaj Feronikelit ’74, pasi me harkimin e tij të rrezikshëm në zonë, mbrojtësi kundërshtar shënoi autogol në fitoren 2-1 të ferizajasve.

Shkëlqimi i Avdullit vazhdoi edhe në sfidën ndaj Gjilanit me dy asistime në fitoren 1-2 në udhëtim.

Ndërkohë harkimi fantastik i tij në zonë bëri që Ferizaj ta ndalë Ballkanin 1-1, pasi Avdulli asistoi te sulmuesi Abdul për t’i siguruar një pikë skuadrës së tij.

Përveç katër asistime në Superligë dhe një penalltie të fituar ndaj Dritës, Avdulli ka dhënë kontribut me dy asistime edhe në Kupën e Kosovës, ku Ferizaj fitoi 4-0.

Në një prononcim për Telegrafin, anësori këmbëshpejtë ka thënë se është shumë i kënaqur me formën e tij personale, derisa sa i përket ekipit beson se kanë mundur të marrin më shumë pikë.

“Mund të them lirisht se ka qenë gjysmë sezoni më i mirë në karrierën time pasi kam dhënë kontribut të madh si në aspektin defensivë ashtu edhe në ofensivë”.

“Fatmirësisht nuk kam pasur asnjë lëndim dhe kam luajtur të gjitha ndeshjet me përkushtim të madh dhe kam dhënë maksimumin për fanellën e skuadrës time”, deklaroi Avdulli.

Mbrojtësi i majtë thotë se sa i përket ekipit kanë mundur të kenë më shumë pikë, por në disa ndeshje i ka munguar fati dhe në disa të tjera janë dëmtuar nga situata të ndryshme.

“20 pikë nuk janë pak, por jam i bindur që kemi merituar më shumë nga ajo çfarë kemi treguar në fushë. Realisht kemi zhvilluar ndeshje të mëdha duke i dominuar shpesh herë kundërshtarët, por fati na kthente shpinën në disa raste”.

“Me atë që ka treguar skuadra ime në fushë mund të them se kemi merituar 6 apo 7 pikë më shumë në renditje”, vazhdoi tutje mbrojtësi anësorë.

Krejt në fund Avdulli tha se pret një stinor pranveror shumë të nxehtë për t’i arritur objektivat personale dhe ato me ekipin. /Telegrafi/