Dështon seanca konstituive - nuk kalon raporti për verifikimin e mandatave të deputetëve

15/04/2025 13:43-Kurti: Opozita u rebelua kundër shtetit, lanë nam në sytë e botës

Ka dështuar sot konstituimi i Kuvendit të Kosovës, pasi që nuk u miratua raporti i komisionit për verifikimin e mandateve. Kryeministri në dorëheqje, Albin Kurti ka reaguar përmes një statusi në Facebook, ku ka akuzuar PDK-në, LDK-në dhe AAK-në. “Deputet e opozitës PDK, LDK, Lista Serbe dhe AAK sot votuan kundër raportit të komisionit për verifikimin e mandateve. Në një votim krejt formal e teknik që bazohet në dokumentacionin e KQZ-së, ata u rebeluan kundër betimit të deputetëve dhe konstituimit të legjislaturës së nëntë”, ka shkruar Kurti. Kurti ka thënë se ky është sulm brenda institucional kundër Republikës së Kosovës dhe zgjedhjeve demokratike. Lajmin e plotë mund ta lexoni KËTU:

15/04/2025 13:41-Mosvotimi i raportit, Abrashi i LVV-së: Situatë e paprecedentë dhe e mjegullt

Deputeti i Lëvizjes Vetëvendosje, Artan Abrashi, njëherësh kryesues i Komisionit të përkohshëm për verifikimin e mandateve tha se situata me mosvotimin e raportit është e paprecedentë. Ai në një deklaratë për media tha se ky Komision si rezultat “i qëndrimeve të opozitës ka shkaktuar një situatë të mjegullt e që mund të karakterizohet edhe si krizë”. “Pa përmes arsyetimeve të paqena është penguar votimi i raportit të Komisionit qendror të zgjedhjeve, pra verifikimit i mandatave të secilit subjekt politik... Pra,  kjo nuk ka ndodh asnjëherë më herë, jemi në një terren krejt tjetër, të panjohur dhe si do të vazhdohet tash e tutje mbetet e mjegullt...”, tha ai.

15/04/2025 13:28-“Lojë e qëllimshme politike” – Abdixhiku godet LVV-në pas dështimit të seancës

Kryetari i LDK-së, Lumir Abdixhiku pas dështimit të seancës për konstituimin e Kuvendit, është shprehur se është një episod i errët në demokracinë parlamentare. Abdixhiku tha se partia fituese nuk respekton rregullin bazik kushtetues që thotë se një i zgjedhur nuk mund të jetë edhe kryeministër apo ministër edhe deputet. “Qëndrimi i partisë fituese që me 10 deputetë që ushtrojnë edhe funksionin e kryeministrit dhe ministrave për të qenë edhe deputetë në të njëjtën kohë është antikushtutese dhe po bëhet për shkak të një loje politike për të zvarritur formimin e institucioneve. Zgjidhja është e thjeshtë të japin dorëheqje prej pozitave që kanë, të ulen si deputetë të bëjnë betimin si deputet”, tha Abdixhiku. Lajmi i plotë KËTU.

15/04/2025 12:37-Nuk kaloi raporti për verifikimin e mandatave të deputetëve – ndërpritet seanca

Kuvendi i Kosovës nuk ka miratuar raportin e Komisionit për verifikimin e mandatave të deputetëve të Kuvendit. Pasi një raport i tillë nuk kaloi, seanca konstituive shkoi në pauzë disa minutëshe. Me rinisjen e seancës, deputeti më i vjetër i Kuvendit, Avni Dehari i cili udhëhoqi seancën tha se kjo seancë ndërpritet dhe do t’i drejtohet presidentes së Kosovës për të parë si të veprohet tutje.

15/04/2025 12:13-PDK, LDK dhe AAK kundërshtojnë raportin për verifikimin e mandateve

Artan Abrashi kryesues i Komisionit të përkohshëm për verifikimin e kuorumit dhe mandatave të deputetëve, ka thënë se ky komision ka konfirmuar se mandatet e deputetëve janë në rregull. Ai tha se raportin e këtij komisioni e kundërshtuan PDK, LDK dhe AAK. “Komisioni i përkohshëm për verifikimin e kuorumit dhe mandatave të deputetëve, paraqet këtë raport që kaloi me shumicë votash, ani pse u kundërshtua nga PDK, LDK e AAK", tha Abrashi.

15/04/2025 12:10-Nuk kalon raporti për verifikimin e mandatave të deputetëve

Në seancën konstituive nuk ka kaluar raporti i Komisionit të përkohshëm për verifikimin e kuorumit dhe të mandateve të deputetëve. Për raportin e Komisionit të përkohshëm votuan 52 deputetë, kundër 46 dhe 11 abstenime. Deputeti Avni Dehari pas kësaj bëri thirri për konsultime.

15/04/2025 11:15-Formohet komisioni i përkohshëm për verifikimin e kourumit dhe mandateve të deputetëve

Ka nisur seanca për konstituimin e Kuvendit të Kosovës, e cila po drejtohet nga Avni Dehari nga LVV si deputeti më i vjetër i Kuvendit, dhe Sala Jashari nga PDK si deputetja më re. Si fillim është themeluar komisioni i përkohshëm për verifikimin e kourumit dhe të mandatave. Partitë propozuan anëtarët e këtij komisioni. Nga LVV si anëtar dhe kryesues i këtij komisioni është propozuar Artan Abrashi. Nga PDK është propozuar Përparim Gruda, Armend Zemaj nga LDK, Branislav Nikoliq nga Lista Serbe, Time Kadrijaj nga AAK-Nisma etj.

15/04/2025 11:05-Nis seanca konstituive

Deputetët e Kuvendit të Kosovës tashmë janë në Kuvend, gjersa ka nisur të mbahet edhe seanca konstituive. Seanca po udhëhiqet nga deputeti më i vjetër Avni Dehari dhe deputetja më e re, Sala Jashari. Të pranishëm në seancë janë edhe ambasadorë të vendeve mike.

15/04/2025 10:56-Vlora Çitaku pritet të jetë nënkryetare e Kuvendit nga radhët e PDK-së, ndërsa Abelard Tahiri sërish shef i grupit parlamentar

Seanca konstituive e Kuvendit të Kosovës edhe pse ishte paraparë të fillonte në ora 10:00, ende nuk ka filluar pas një ore vonesë. Telegrafi ka kuptuar se Vlora Çitaku pritet të jetë nënkryetare e Kuvendit nga radhët e PDK-së, ndërsa Abelard Tahiri sërish shef i grupit parlamentar. Në zgjedhjet e 9 shkurtit, PDK u radhit si partia e dytë.

15/04/2025 10:54-Deputetët e LVV-së hyjnë në sallën e Kuvendit

Pas gati 1 orë prej kur është planifikuar të niste seanca konstituive kanë nisur të hyjnë në sallë deputetët e Lëvizjes Vetëvendosje. Kryetari i kësaj partie, Albin Kurti para se të hynte në Kuvend nuk është deklaruar nëse i kanë votat për Qeverinë. Kjo parti ka 48 deputetë në Kuvend.

15/04/2025 10:51-Hykmete Bajrami emërohet shefe e Grupit Parlamentar të LDK-së: Nuk votojmë për zgjedhjen e kryeparlamentarit

Hykmete Bajrami është emëruar shefe e re e Grupit Parlamentar të LDK-së. Kështu bëri të ditur kryetari i kësaj partie, Lumir Abdixhiku gjatë hyrjes në sallën e Kuvendit të Kosovës. Ndërkaq Bajrami bëri edhe deklarimin e parë si shefe e deputetëve të LDK-së, lidhur me konstituimin e Kuvendit. “Grupi parlamentar nuk ka ndryshuar qëndrim. Ne nuk do ta votojmë kryetarin e Kuvendit. E nëse LVV ka propozim për kryetarin e Kuvendit ata duhet ti kenë edhe votat”, tha Bajrami

15/04/2025 10:48-Lista serbe hyn në Kuvend

Deputetë të Listës serbe tashmë kanë hyrë në Kuvendin e Kosovës. Igor Simiq e deputetë tjerë të kësaj partie nga radhët e minoritetit serb tashmë janë në ambientet e Kuvendit.

15/04/2025 10:39-Vonesa në nisjen e seancës konstituive, në sallën shihen vetëm deputetët e PDK-së dhe Duda Balje

Kuvendi i Republikës së Kosovës sot mban seancën konstituive pas më shumë se dy muajsh nga mbajtja e zgjedhjeve parlamentare. Seanca ishte caktuar të nisë në ora 10:00, por që seanca ende nuk ka nisur as pas 40 minutash vonesë. Të pranishëm në sallë shihen vetëm deputetët e zgjedhur të PDK-së, dhe deputetja Duda Balje. Lajmi i plotë këtu.

15/04/2025 10:30-Rashiq beson se edhe në qeverinë e re do ta ketë postin e ministrit

Kryetari i Partisë për Liri, Drejtësi dhe Mbijetesë (PLDM) dhe njëherësh ministër në detyrë për Komunitete dhe Kthim, Nenad Rashiq, tashmë ka arritur në Kuvend. Rashiq tha se beson që edhe në qeverinë e re, do ta ketë postin e ministrit.

15/04/2025 10:24-Deputetët e PDK-së para nisjes së seancës

Tashmë deputetët e Partisë Demokratike të Kosovës kanë hyrë në sallën e Kuvendit, ku pas pak pritet të nisë seanca konstitutive. Në sallë shihen deputetja Vlora Çitaku, Abelard Tahiri, Mërgim Lushtaku, Eliza Hoxha, etj.

15/04/2025 10:15-​Emilija Rexhepi: Nuk kam ofertë për ministre, por do ta votojmë Qeverinë  

Zëvendëskryeministrja në detyrë, Emilja Rexhepi, ka konfirmuar se do ta mbështesë votimin e qeverisë së re e cila sipas saj do të drejtohet nga Albin Kurti, pavarësisht se nuk ka marrë ndonjë ofertë për të ministre edhe një mandat. "Patjetër që do e votojë qeverinë, ne jemi pjesë e qeverisë veç unë nuk e kam marrë atë ofertën që të jem ministre, kthehem në parlamentar, por jemi pjesë e Qeverisë", tha Rexhepi. "Dikush prej boshnjakëve duhet me qenë, unë nuk jam kundër, këtë e vendos kryeministri", shtoi Rexhepi, ku u pyet nëse pozita e ministres i është ofruar Duda Baljes.

15/04/2025 10:12-AAK e hapur për votimin e kryetarit të Kuvendit, por jo pa koordinim me opozitën

  Kryetari i AAK-së, Ramush Haradinaj ka arritur në ambientet e Kuvendit të Kosovës ku pritet që sot të mbahet seanca për konstituimin e Kuvendit. Haradinaj ka thënë se si AAK nuk do të jenë pengesë e zgjedhjes së kryeparlamentarit, mirëpo tha do të vendosin bashkërisht me dy partitë tjera opozitare PDK e LDK. I pari i AAK-së tha se ka deklarime prej tyre se nuk do të marrin pjesë në votim edhe për kryeparlamentarin. Lajmi i plotë KËTU.

15/04/2025 10:03-Edhe Limaj arrin në Kuvend, a do ta mbështesë Kurtin për formimin e Qeverisë së re?

Kryetari i Nismës Socialdemokrate, Fatmir Limaj tashmë ka arritur në Kuvend të Kosovës. I pyetur nga gazetarët nëse ai do të jep votën e tij për formimin e qeverisë së re, Limaj nuk dha ndonjë përgjigje, transmeton Telegrafi. Lajmi i plotë këtu.

15/04/2025 09:44-Kryetari i PDK-së arrin në Kuvend

Kryetari i Partisë Demokratike të Kosovës, Memli Krasniqi tashmë ka hyrë në Kuvendin e Kosovës, ku pas pak pritet të nisë seanca konstitutive. Kjo parti ka fituar 24 ulëse në Kuvendin e Kosovës. Nga kjo parti kanë thënë se nuk do të marrin pjesë në formimin e Qeverisë.

15/04/2025 09:38-Seanca konstituive, Kurti arrin në Kuvend

Për pak minuta pritet të nisë seanca konstitutive e Kuvendit të Kosovës. Tashmë kryeministri në detyrë, Albin Kurti ka hyrë në Kuvendin e Kosovës. Kurti u pyet nga gazetarët se a i kanë votat për formimin e qeverisë, por që i njëjti nuk ka dhënë ndonjë përgjigje rreth kësaj. Në Kuvend kanë nisur të hyjnë edhe deputetë tjerë.

15/04/2025 09:11-Heshtje para seancës konstituive

Edhe pak orë kanë mbetur deri në mbajtjen e seancës konstituive për formimin e legjislaturës së nëntë të Kuvendit të Kosovës dhe në kuadër të këtij procesi edhe formimi i Qeverisë së Kosovës. Kryeministri në detyrë i Kosovës, Albin Kurti, ka zhvilluar së fundmi disa takime me përfaqësues të partive të komuniteteve joshumicë që kanë siguruar ulëse në Kuvendin e Kosovës, me qëllim sigurimin e votave për formimin e Qeverisë së re, Kurti 3. Telegrafi ka tentuar të marrë qëndrim nga disa prej përfaqësuesve të këtyre partive, përfshirë kryetarin e Partisë Liberale Egjiptiane, Veton Berisha, deputetin e zgjedhur të Partisë Unike Gorane, Adem Hoxha, si dhe kryetaren e Listës së Bashkimit Demokratik, Duda Balje. Megjithatë, asnjëri prej tyre nuk ka qenë i qasshëm për koment. Lajmin e plotë mund ta lexoni këtu:

15/04/2025 08:40-Tre skenarët e seancës konstituive

Njohësi i proceseve zgjedhore dhe i punës së Kuvendit, Eugen Cakolli ka paraqitur tre skenarë të mundshëm proceduralë dhe politikë që mund ta përcjellin seancën konstituive të Kuvendit të Kosovës, e cila pritet të mbahet nesër, apo edhe seancat pasuese. Skenari 1: Konstituimi i suksesshëm i Kuvendit Sipas këtij skenari, pas hapjes së seancës, verifikimit të mandateve dhe betimit të deputetëve, Lëvizja Vetëvendosje (LVV), si subjekti më i madh parlamentar, propozon kandidatin për Kryetar të Kuvendit. Nëse kandidatura merr së paku 61 vota – qoftë përmes një marrëveshjeje formale për koalicion apo përkrahjeje joformale nga opozita – atëherë procedohet me zgjedhjen e nënkryetarëve dhe Kuvendi konstituohet plotësisht. Skenari 2: Pezullimi i seancës për shkak të mungesës së propozimit Nëse pas hapave të parë, LVV refuzon të propozojë kandidatin për Kryetar të Kuvendit ose kërkon “konsultime shtesë”, atëherë kryesuesi i seancës, Avni Dehari, duhet ta pezullojë seancën. Skenari 3: Bllokim që në hapin e parë Në këtë skenar, duke qenë se LVV nuk e ka shumicën parlamentare, situata mund të bllokohet që në fillim të seancës. Lajmin e plotë mund ta lexoni këtu: