Mbrojtësi i Juventusit, Daniele Rugani ishte lojtari i parë i Serie A që doli pozitiv e coronavirus dhe agjenti i tij zbulon se periudha e karantinës për mbrojtësin do të përfundojë së shpejti.
Qendërmbrojtësi është testuar pozitivisht në 11 mars, ndërsa pas tij dolën pozitiv edhe shokët e skuadrës Blaise Matuidi dhe Paulo Dybala.
“Periudha e tij e karantinës do të përfundojë së shpejti. Duhet të përfundojë në ditët e ardhshme”, ka thënë agjenti Davide Torchia për Radio Sportiva.
“Pas Pashkëve do të kuptojmë nëse ai mund të largohet nga dhoma ku po qëndron”.
Rugani ishte në stolin e rezervistëve në ndeshjen e fundit të Serie A ndaj Interit, por nuk u paraqit në ndeshje.
“Ai ka stërvitur si zakonisht pas ndeshjes me Interin. Më pas të martën temperatura e tij u ngrit shumë. Një ditë më pas ai u testua për Covid – 19. Por nuk ka pasur simptoma tjera prej atëherë”, ka thënë agjenti i futbollistit të Juves. /Telegrafi/
