Rriten çmimet e ndërtimit në Shqipëri

Rritja e çmimeve, krahas produkteve ushqimore po shtrihet dhe në sektorë të tjerë, duke përfshirë ndërtimin.

Kjo rritje ka ardhur kryesisht për shkak të shtrenjtimit të lëndëve të para, ku rolin kryesor e luan hekuri. Teksa ndërtimi po vuan për gjetjen e fuqisë punëtore, kompanitë janë detyruar të rritin dhe pagat për punonjësit, duke u renditur në faktorin e dytë që ka ndikuar në rritjen e kostove të ndërtimit. Transporti është një tjetër faktor që ka shtrenjtuar kostot.

INSTAT raportoi se Indeksi i Kushtimit në Ndërtim, në tremujorin e dytë 2021 arriti 101.5 kundrejt tremujorit të katërt 2020 si periudha bazë.

Ndryshimi vjetor i Indeksit të Kushtimit në Ndërtim në tremujorin e dytë 2021 është 1.3 për qind, një vit më parë ky ndryshim ishte 0.4 për qind.

Lexo po ashtu Çmimet e materialeve ndërtimore në Kosovë, brenda një viti u rriten me 12 për qind

Ndryshimet vjetore të grupeve kryesore: Krahasuar me të njëjtin tremujor të një viti më parë, rritja më e madhe e çmimeve vërehet në grupin “Shpenzime materiale” dhe “Shpenzime për paga” me 2 për qind secili, pasuar nga grupet “Kosto të tjera” me 1.8 për qind, “Shpenzime transporti” me 1.4 për qind dhe “Shpenzime makinerie” me 0.3 për qind. Brenda grupit “Shpenzime materiale”, indekset e nëngrupeve “Materiale ndërtimi” dhe “Materiale elektrike dhe komunikimi” shënuan rritjen më të lartë me 2.2 për qind secili.

Indeksit i Kushtimit në Ndërtim shënoi rritje me 0.6 për qind krahasuar me tremujorin e parë të vitit 2021. Rritja më e madhe e çmimeve vërehet në grupin “Shpenzime transporti” me 1.3 për qind, pasuar nga grupet “Shpenzime materiale” me 0.9 për qind, “Shpenzime makinerie” me 0.5 për qind, “Shpenzime për paga” me 0.4 për qind, “Kosto të tjera” me 0.2 për qind dhe “Shpenzime energjie” me 0.1 për qind. /Monitor/