Roma po përgatit një ofertë për të bindur Intel-in të investojë miliarda euro në një fabrikë të mikro-çipave në Itali

Roma po përgatit një ofertë për të provuar të bindë Intel të investojë miliarda euro në një fabrikë të avancuar të prodhimit të mikro-çipave në Itali, pasi Gjermania del si kryesuese për të krijuar një megafabrikë edhe më të madhe të planifikuar nga kompania amerikane, kanë thënë burime për Reuters.

Sipas mediumit në fjalë, fabrikat do të jenë pjesë e një përpjekjeje të grupit amerikan për të ndërtuar kapacitete prodhuese të avancuara në Evropë për të ndihmuar në shmangien e mungesës së furnizimit në të ardhmen të llojit që aktualisht ka dëmtuar industrinë e automobilave në veçanti, përcjell Telegrafi.

Roma është tashmë në bisedime me Intel për investimin e mundshëm, i cili sipas vlerësimeve paraprake do të ishte më shumë se 4 miliardë euro (4.7 miliardë dollarë), thanë burimet që janë përfshirë në diskutime.

Njëri prej tyre tha se totali mund të arrijë edhe rreth 8 miliardë euro, në varësi të planeve të Intel.

Megjithatë, ata nuk pranuan të identifikoheshin sepse detajet janë konfidenciale.

Roma është e gatshme të financojë një pjesë të investimit të përgjithshëm me para publike dhe të ofrojë kushte të favorshme për Intel, duke përfshirë kostot e punës dhe energjisë, thanë burimet.

Fabrika do të krijonte më shumë se 1000 vende pune direkte në Itali, shtuan ata. /Telegrafi/