Rikthehen maskat në Mal të Zi – Vendosja është e detyrueshme në dyqane, institucione publike dhe disa vende të tjera

Instituti për Shëndetin Publik të Malit të Zi ka mbajtur një konferencë të jashtëzakonshme lidhur me situatën aktuale epidemiologjike, të shkaktuar nga pandemia e virusit COVID-19.

Drejtori i IJZ-së, Igor Galiq, tha se për shkak të rritjes së numrit të të infektuarve dhe të shtruarve në spital, janë rikthyer disa prej masave për parandalimin e numrit të rasteve me coroanvirus.

Bëhet e ditur se tani është e detyrueshme mbajtja e maskave mbrojtëse në të gjitha institucionet e administratës publike, si dhe në dyqane ushqimore, barnatore dhe pika të karburanteve.

Mbajtja e detyrueshme e maskave mbrojtëse gjithashtu vlen edhe për ambientet e mbyllura të aeroportit, stacioneve hekurudhore dhe autobusëve.

“Nëse këto masa nuk sjellin përmirësim të situatës në periudhën e ardhshme, do të pasojnë masat e mbajtjes së maskave të detyrueshme në të gjitha ambientet e mbyllura”, thuhet në njoftim.

Ndryshe, Mali i Zi deri më tani ka regjistruar 257 mijë raste me coronavirus gjersa kanë vdekur 2742 persona. /Telegrafi/