Rey Manaj drejt transferimit tek gjiganti turk – bisedimet tashmë kanë filluar

Gjatë ditëve të fundit u raportua në mediat turke se sulmuesi shqiptar Rey Manaj do të largohet së shpejti nga Sivasspori. 

Kjo për shkak se interesim për të besohet të ketë shprehur Trabzonspor, të cilët duan ta përforcojnë fazën e sulmit gjatë afatit kalimtar dimëror. 

Për transferimin e Manajt tek gjiganti turk kishte pasur thashetheme edhe para fillimit të këtij sezoni, pasi trajneri i tyre Senol Gunes ishte tejet i interesuar për 27-vjeçarin. 

Është lënë të kuptohet se drejtuesit e klubit kanë marrë masat e nevojshme për të ‘testuar ujërat’ me Sivassporin për transferimin e mundshëm të tij. 

Se a do të realizohet kalimi i reprezentuesit shqiptar tek Trabzonspori kjo varet nga shuma e parave që do të kërkojë klubi i tij aktual. 

Kujtojmë se Manaj ka kaluar në një formë të shkëlqyer me Sivasspor sezonin e kaluar duke arritur që të shënojë 22 gola në kampionat. 

Megjithatë, këtë sezon për shkak të lëndimeve ai ka arritur që të marrë vetëm 954 minuta ose 12 ndeshje, duke shënuar katër gola. 

Ai po priste për një përmirësim të kontratës nga Sivasspori, por duket se gjithçka mes tij dhe klubit ka marrë fund dhe palët nuk kanë arritur të gjejnë gjuhën e përbashkët./Telegrafi/