Regjistrimi i popullsisë, në Prishtinë mbi 30 për qind e banesave dhe shtëpive janë të pabanuara

Sipas procesit të regjistrimit nga Agjencia e Statistikave të Kosovës (ASK), 1,589,659 banorë është numri i popullsisë në Kosovë.

Nga ta janë 795,046 meshkuj dhe 791,614 janë femra.

Këto shifra përfshijnë vetëm banorët vendorë dhe jo diasporën.

Nga gjithsej 38 komuna të Kosovës, 9 prej tyre kishin rritje të popullsisë, 29 të tjera kishin zvogëlim të numrit të popullsisë.

Por, nëpër komunat e Kosovës, është evidentuar një përqindje e lartë e banesave dhe shtëpive të pabanuara.

Lexo po ashtu Pesë qytetet me numrin më të madh të banorëve në Kosovë

Interesant është se pavarësisht që kryeqyteti është gjithmonë i kërkuar për banim, në bazë të statistikave del që 30.7 për qind e banesave dhe shtëpive janë të pabanuara.

Përqindja më e lartë është në Komunën e Dragashit, ku gati gjysma e shtëpive dhe banesave janë të pabanuara (43.4%).

Pas Dragashit vjen Istogu si komuna me më së shumti banesa e shtëpi të pabanuara (41.2 %).

Befasi është edhe  Suhareka e cila pavarësisht se njihet si një vend mjaft i industrializuar, të pabanuara i ka 40.7 për qind të banesave dhe shtëpive.

Edhe Komuna e Klinës ka një numër të madh të shtëpive dhe banesave të pabanuara (40.4%).

Lexo po ashtu Rajoni i Pejës pëson rënie të popullsisë në krahasim me vitin 2011, për rreth 30 mijë banorë

Vitia përmbyll top-pesëshen e komunave që kanë më së shumti njësi banesore të pabanuara me 39.2%.

ASK-ja thotë se përveç migrimit jashtë Kosovës, është vërejtur edhe migrim brenda vendit, që ka shkaktuar largim të banorëve nga zonat kufitare të Kosovës drejt qyteteve më në qendër./Telegrafi/