Referendum për librat dixhital në Maqedoni, Komisioni kuvendar e pranon nismën

Komisioni parlamentar i Sistemit Politik dhe Marrëdhënieve mes Bashkësive si dhe ai Juridiko Ligjvënës kanë pranuar nismën për referendum të dorëzuar nga iniciativa qytetare “Libra dhe mësim patjetër të ketë”.

Nga kjo nismë thonë se tashmë i mbetet kreut të Kuvendit të deklarohet për referendumin që më pas të hapet rruga për aktivitetet e ardhshme. Nga iniciativa “Libra dhe mësim patjetër të ketë” kërkojnë tërheqjen e propozim ligjit për tekstet shkollore që parasheh edhe digjitalizimin e librave.

Kjo është iniciativa e dytë për referendum në Kuvend, të cilën e dorëzoi një grup prindërish që janë kundër digjitalizimit të tërësishëm të librave deri në klasën e katërt. Herën e parë të dy komisionet e hodhën poshtë propozimin me arsyetim se iniciativa nuk ka qenë në pajtueshmëri me Ligjin për Referendum.

Tani, kryetari i Kuvendit, Talat Xhaferi duhet ta pranojë propozimin, pas çka do të fillojë grumbullimi i 10.000 nënshkrimeve të nevojshme për shpallje të referendumit në nivel të të gjithë shtetit.