Rastet e reja me COVID-19, sipas komunave

Sot janë konfirmuar 40 raste të reja me coronavirus në Kosovë, kurse 6 persona janë shëruar.

Sipas institutit, sot më së shumti raste janë shënuar në Prishtinë, gjithsej 10 raste.

8 raste në komunën e Vushtrrisë (sipas vendbanimit: 6 Vushtrri, 1 Akrashticë, 1 Maxhunaj), 7 raste në Prizren (sipas vendbanimit: 4 Tupec dhe 3 Prizren), 6 raste në Fushë Kosovë (sipas vendbanimit: 3 Fushë Kosovë dhe 3 Miradi e Poshtme), 5 raste në Obiliq (sipas vendbanimit: 5 Milloshevë), dhe me nga 1 rast komuna Skenderaj (vendbanimi: 1 Likoc), komuna Gjilan (sipas vendbanimit: 1 Gjilan), komuna e Rahovecit (sipas vendbanimit: 1 Rahovec) dhe komuna e Mitrovicës (sipas vendbanimit: 1 Mitrovicë).

Qeveria e Kosovës, në mbledhjen e mbajtur të dielën, ka miratuar disa masa lehtësuese të rekomanduara nga Instituti Kombëtar i Shëndetësisë Publike.

Lexo po ashtu Edhe 40 raste të reja me COVID-19, e gjashtë të shëruar në Kosovë

Ministri i Shëndetësisë, Armend Zemaj, tha se nga e hëna (8 qershor), qytetarët që hyjnë në Kosovë, përmes kufijve tokësorë, nuk do të detyrohen që të vetizolohen për shtatë ditë, por ata do të kontrollohen në kufi nga ekipet mjekësore, do t’u merren të dhënat, që më pas Qendrat e Mjekësisë Familjare, në komunat përkatëse do të monitorojnë gjendjen e tyre shëndetësore.

Zemaj tha se me këto veprime do të mundësohet lëvizja e lirë e qytetarëve dhe mallrave, veçanërisht e qytetarëve që hyjnë në Kosovë nga Shqipëria dhe Lugina e Preshevës. Ai po ashtu kërkoi që të rritet numri i inspektorëve, të cilët do të monitorojnë nëse qytetarët, bizneset dhe institucionet e tjera, po respektojnë rekomandimet për të frenuar përhapjen e coronavirusit.

Po ashtu, nga 8 qershorit, Qeveria e Kosovës vendosi që të heqë orarin e kufizimit të lëvizjes të qytetarëve nga ora 21:00 deri në orën 05:00.

Ministri Zemaj tha se këto lehtësime të masave po bëhen pas rekomandimeve të Institutit Kombëtar të Shëndetësisë Publike. /Telegrafi/