Raportimi për tentim atentat, Abdixhiku thotë se nuk ndihet i rrezikuar

Kryetari i Lidhjes Demokratike të Kosovës, Lumir Abdixhiku shprehet se nuk ndihet i rrezikuar ndaj tentim atentatit ndaj tij.

I pyetur për motivin e këtyre kërcënimeve, lideri i LDK-së, tha se nuk mund të paragjykojë, por beson në punën e organeve të drejtësisë.

“Janë Policia e Kosovës dhe organet e sigurisë që vlerësojnë një gjë të tillë jo partitë politike erdha në Kuvend siç kam ardhur çdo ditë…(A ndiheni i rrezikuar) Jo, jo vazhdojmë punën tonë si çdoherë“, tha ai.

Ndërkaq, deputeti Armend Zemaj ka thënë se tani gjithçka është në dorën e organeve të rendit të Kosovës.

“Personalisht në këtë fazë mbetet fjalën e vet ta thotë drejtësia, pjesët tjera ne i marrim, pyesni Policinë e Kosovës, ata i kanë informacionet, i kanë informatat me partnerët ndërkombëtarë, me gjithë të tjerë, ashtu janë ndarë edhe me neve edhe ne ashtu do ta vazhdojmë punën tonë”, tha ai.

Zemaj u shpreh se Kosova mund të ketë armiq me emra të përveçëm, por ata që e dëshirojnë lirinë, pavarësinë janë më të mëdhenj se sa kriminelët.

“Gjithçka çka është dashtë nga organet e rendit është vlerësim pozitiv edhe punë e mirë që e kemi parë deri më tani, tha ai.

Të mërkurën Policia e Kosovës ka konfirmuar se cak i një atentati të mundshëm ka qenë kryetari i LDK-së, Lumir Abdixhiku dhe tre deputetë të tjerë të LDK-së, Avduallah Hoti, Armend Zemaj dhe Arben Gashi.

Një grup shqiptarësh që jetojnë jashtë Kosovës kishin rënë në përgjimin e policisë gjermane, teksa kanë qenë duke folur për realizimin e disa vrasjeve politike në Kosovë.

Organizatori i atentatit është raportuar se në shënjestër kishte edhe kryetarin e PDK-së, Memli Krasniqin dhe deputeten e kësaj partie Ganimete Musliu.